aningaasaqarneq

Nationalbanki: Aningaasaqarnikkut politikki suli qajannaatsuunngilaq

Piffissami matumani Nunarput aningaasarsiorluarpoq, tamannalu allanngoriaannaavoq. Danmarkimi Nationalbanki paasiniaaqqissaarnermini taama mianersoqqusivoq.

Aningaasaqarnikkut suliffissaaleqisulli ikiliartornerat ingerlalluarput. Tamannalu politikkerit uniinnarfigisariaqanngilaat. Amerlavallaanimmi suli aaqqinneqarsimanngitsunik ajornartorsiuteqarpoq.

Tamanna Kalaallit Nunaanni Aningaasaqarneq pillugu paasiniaaqqissaarsimanermi Danmarkip Nationalbankianit saqqummiunneqaqqammersumi erserpoq.

Napparsimavinnut utoqqalinersialinnulli aningaasartuutit qaffassasut

Raajanik isertitsissutigineqartut nunatta karsianut sunniuteqarlualaavissimapput. Taassumalu saniatigut suliniutit annertuut soorlu Nuummi umiarsualivittaassaaq isertitsivittaassarlu aningaasaqarnermut ingerlalluartitsipput.

Ineriartorluarnerulli saniani ajornartorsiuterpassuit allat suli aaqqinneqarsimanngillat.

- Tunngaviatigut aningaasaqarnikkut politikki qajannaatsuunngilaq, aningaasaateqarfimmi økonomit ersarissumik naliliipput.

Ajornatorsiut nutaarsiassaananilu ilisimaneqarpoq. Inuit sulisinnaasut ikiliartortussaapput, utoqqaalli amerlanerulertussaallutik. Tamatuma kingunerissavaa utoqqalinersialinnut napparsimavinnulli aningaasartuutit amerlanerulernerat.

- Inatsisini aningaasartuuteqarnerulernissaq isumannaarneqanngilaq, Nationalbanki allappoq. Allatut oqaatigalugu: Massakkutut ittumik ingerlatilluta akissaqartinngilluinnarparput.

Isertitsissutigineqarsinnaasutut periarfissat nutaat

Aalisarnerup saniatigut allanik aningaasarsiornissaq ujartorneqartariaqartoq, økonomit tikkuarpaat. Taakku ilaatigut aatsitassalerineq periarfissat ilaattut tikkuarpaat, malunnaatilimmillu sunniuteqassappat aatsitassalerinermik suliniut amerlanerusariaqarput.

Takornarialerinerlu aamma eqqaaneqarpoq, paasianiaaqqissaarnermilu tikkuarneqarpoq takornarissat tikittartut amerlanerulersinnaanerat killeqarnerat.

- Takornariaqarneq qularnanngitsumik inerisarneqarsinnaavoq, takornarialli takorusutaat pinngortitaq innarlerneqanngitsoq killeqartitsivoq, analysemi allassimavoq.

AAMMA ATUARUK: Naatsorsuutaanngitsumik nunatta karsiani sinneqartoorneq nuannaarutigineqartoq

Powered by Labrador CMS