aningaasaqarneq

Nationalbankeni Savalimmiunut mianersoqquteqarpoq

Savalimmiuni aningaasaqarniarneq navianartorsiortoq, Nationalbankeni mianersoqqusivoq. Aningaasaliissutit kinguartinneqarlik kommunillu amigartoorutaat aaqqissuteqarfigalugit, Københavnimi siunnersuisoqatigiit, nalunaaruteqarput.

Torshavn - Færøernes største by - oplever stor fremgang i økonomien, men der investeres mere end overskuddet på de offentlige finanser.

Savalimmiuni kapisillit tukertitsitsivianeersunik akisuunngorlugit pisiarineqartartuni avammut tunisatigut isertitarisartagaat amerlasuujupput. Avataasiorlunilu aalisarneq aammattaaq ingerlalluarpoq.

Aningaasarsiornikkut ingerlalluarneq

Umiarsualiviit, atuarfeqarfiit sullorsuillu amerlasuunik aningaasaliiffigineqarput, ullullu tamaasa ineqarnermut akit qaffakkiartorlutik.

Savalimmiut aningaasarsiornikkut ingerlalluarpoq, tamannalu Nationalbankenip navianartoqartippaa.

- Savalimmiuni siusinnerusukkut aningaasarsiornikkut ingerlalluarfimmi aningaasaqarnermut politikki tunngaviginnerpaasimanngilaq, aningaasaqarnerullu ingerlanerani patajaallisaataasimanani. Taamatut pisoqaqqilerunarpoq, tamannalu aningaasaqarnikkut navianartorsiornermik kinguneqaqqissinnaavoq.

Nationalbankenip Savalimmiuni aningaasaqarneq pillugu nalunaarusiamini taama allappoq.

Aningaasanut inatsimmi sinneqartoorneruneq

Savalimmiuni naalakkersuisut naatsorsuutigaat 2017-imut 205 millionit koruuninik sinneqartoorfiunissaa. Kisianni ikippallaartut, Nationalbanken naliliivoq. Kommunimmi amigartoorutaat amerlanerusussaapput, 226 millionit koruuninik amigartooruteqarlutik.

Kommunit aningaasaliissutaat 2015-imiit 2016-imut 41 procentinik qaffariaateqarsimapput.

- Nationalbankeni taamaammat naliliivoq pisortani aningaasat sinneqartoorfissatut pilersaarutigisamiit sukkanerusumik amerliartortinneqarnissaat. Aningaasaqarnernikkut ingerlalluarnerup nalaani siunissami pisortat aningaasatigut unammilligassaannut iliuuseqarnissamut piffissaq naleqquttoq, nalunaarusiami allassimasoqarpoq.

Kommuninik suleqateqarniartoq

Savalimmiuni ingerlallualerneq 2013-imi aallartippoq. Ingammik ukiuni kingullerni kommunit allanut aningaasaliinissaat periarfissagissaarpoq. Savalimmiuni naalakkersuisuit kommunit aningaasaqarnerinik aqutsinissamik Danmarkimi ilisimaneqartutut periarfissaqanngillat.

Aningaasanut tunngasunut naalakkersuisoq, Kristina Háfoss (T), Savalimmiuni tv-imut oqaatigaa, aningaasaqarneq aqulluarnerujumallugu kommunit suleqatigineqarusunnerat.

Naalakkersuisoqatigiit aporfilersuisut

Taamaattoq naalakkersuisoqatigiit Javnaðarflokkurin, Tjóðveldi aamma Framsókn akornanni kommunit aningaasaqarnerinik aqutsinissamut inatsisiliornissaq amerlanerussuteqarfiunngilaq.

Illuatungiliuttuni partiit annerit ilaanni, Sambandpartiip siulittaasuata, suliniutit ilaat kinguartinneqarnissaat Naalakkersuisunut kaammattuutigaa.

- Suliniutit suli aallartinneqarsimanngitsut, kinguartinneqarsinnaapput, Bárður Nielsen Savalimmiut tv-eqarfianut oqaatigaa.

Aningaasanut inatsit

Aningaasanut inatsissatut siunnersuut kingusinnerpaamik 30. september lagtingimut saqqummiunneqassaaq.

Powered by Labrador CMS