Atuagassiaq National Geographic Traveler naapertorlugu Kalaallit Nunaat 2016-imi angalalluni ornitassat nunarsuarmi pitsaanerpaat ilagivaat.

Tusagaasialeriffiup tusaamasaasup pisortatigoortumik nalunaarutigeqqammerpaa aappaagu Kalaallit Nunaat ornitassaqqissut siulliit 20-t akornanni ornittariaqartut ilagigaat, takornariaqarnikkut siunnersuisooqatigiit Visit Greenland ilisimatitsivoq.

Tulluusimaartut
Siunnersuisooqatigiit tulluusimaarutigivaat piffissap sivikitsup iluani Nunarput aappassaa angalatuunit nunat ornitassaqqissut ilaattut innersuussaanera.

- Uagutsinnut nuannerluinnarpoq nunarput National Geographic Travellerimit 2016 imi ornitassaqqissut ilaattut toqqarmagu, Visit Greenlandip pisortaanera Anders Stenbakken oqarpoq.

Peqqutit assigiinngitsut
Nunarput avataaniit taamatut isiginiarneqarneranut assigiinngitsut peqqutaapput: Timmisartukkut angalanissamut periarfissat aqqutissallu amerliartorneri, ornitassani misigisassat amerlanerulerlutillu pitsaanerulerneri, nunatta avataani angalatitseqatigiiffiit amerliartortut, Kalaallit Nunaat angalanissamut pilerisaarutiminnut ilannguttalernera kiisalu erseqqarinnerusumik avammut nitarsaassisalerneq.

Nersornaasiinerit allat
Qanittukkut Kalaallit Nunaat Lonely Planetip ‘Best in Travel Top 10 Country’ (Angallavissaqqinnerpaat qulit akornanni) ilannguppaa, ukioq mannalu siusinnerusukkut National Geographicip Kalaallit Nunaat ornitassat puigunaalluinnartut  50-t akornannut inissippaa, isumaqaramimmi tikeraakkat inuunermi puigunngisaannagassat ilagigaat.  

2016 nunarsuarmi ornitassaqqinnerpaat 20 siulliit ullaaq pisortatigoortumik nalunaarutigineqarpoq, ualeq mannalu nalunaaqutaq 15.00 National Geographic Travelerip Twitterikkut Oqallittarfiani malunnartinniarneqassaalluni. Peqataasunit hashtag #NatGeoTravelChat atorneqassaaq.