Nathanielsen: Innuttaasut tamarmik plug-ininut akikillisaassutinut aningaasalersuissanngillat

Plug-in hybridbiilinut qaffasinnerusumik ukiumoortumik akitsuusiisarlernissamik kiisalu plug-in hybridbiilit nutaat eqqunneqarneranni akitsuuserneqartalernissaannik siunnersuut inuit attaveqaqatigiittarfiisigut politikkerinillu isornartorsiorneqarpoq.

Plug-in hybridbiilinik nutaanik pisiaqarsimagaanni nunatsinnut eqqunneqarneranni ullumikkut akitsuusiisoqarneq ajorpoq, biilinullu taakkununnga assersuunneqarsinnaasunut allanut sanilliullugit taakku ukiumoortumik passinnerusumik akitsuuserneqartarput.

Naalakkersuisut tamanna nutaamik inatsisissatut siunnersuuteqarnermikkut allanngortikkusuppaat, Aningaasaqarnermut Naalakkersuisoq Naaja H. Nathanielsen Sermitsiaq.AG-mut oqarpoq:

- Inatsisissatut siunnersuutip malitsigisaanik plug-in hybridbiilit 2023-mi januaarip aallaqqaataa aallarnerfigalugu nunatsinnut eqqunneqartut akitsuuserneqartalissapput. Plug-in hybridbiilit nunatsinnut eqqunneqareersimasut, ukiut tallimat ingerlaneranni motoorimut akitsuummik qaffakkiartuaarneqartumik akitsuuserneqartassapput. Biilit oqimaattut aqqusinernut ajoqusiisartut matumani pineqarput, taakkulu avatangiisinut innarliisartut maanna paasineqarsimalluni, Nathanielsen mailikkut Sermitsiaq.AG-mut allappoq.

Immikkut pineqarnissamut tunngavissaaruttoq

- Isumaqarpunga inatsisissatut siunnersuut aningaasanik isertitsissutissatut pitsaasuusoq, inuttut atukkat avatangiisillu eqqarsaatigalugit naammaginartumik aaqqiissutissaagami.

Akitsuutitigut allannguinissaq pillugu inatsisissatut siunnersuut maanna tusarniaassutigineqarpoq, tassunga atatillug Demokraatit Nalerarlu siunnersuummut akerliullutik nalunaaruteqarsimapput, tassani plug-in hybridbiilit akitsuuserneqarnissaat isumaqatiginnginnamikku.

Naaja Nathanielsen isumaqarpoq, biilip taama ittup immikkut pineqarnissaanut tunngavissaaruttoq:

- Plug-in hybridbiilinik piginnittut sakkukitsunik pitsaasunillu atugassaqartinneqarsimapput, biilimmi pineqartut avatangiisinut innarliinnginnerusartut pillugit siusinnerusukkut isumaqarsimagatta. Tamannali kukkusuusoq paasinarsisimavoq, taamalu immikkut pineqarnissaannut tunngavissaarussimalluni.

Biilimmi innaallagiartortut?

- Innuttaasut tamarmik biilinut avatangiisinut iluaqutaanngitsunut akilersuitinneqarnissaat tunngavissaqanngilaq, naalakkersuisoq allappoq.

Naalakkersuisut aamma siunnersuutigisimavaat, biilit innaallagiatortut aamma akitsuuserneqartanngitsut eqqunneqarneranni akitsuuserneqartalissatut.

Apeqqut: Biilit innaallagiatortut nunami maani erngup nukinganik innaallagissiorfimmit sarfalersorneqarlutik mingutsitsinngitsumik ingerlasinnaasut eqqunneqarneranni akitsuuserneqartalernissaat ajortumik takutitsinerunngila?

- Biilit innaallagiatortut oqimaassutsiminnut sanilliullugu annikinnerusumik motoorinut akitsuuserneqartarnermikkut suli iluaquserneqartassapput. Inatsimmilu aalajangersarneqassaaq, biilinik innaallagiatortortunik pisiaqarsimasut eqqussinermi aningaasatigut tapiiffigineqartarnissaat. Taamaalillu biilit taakku suli immikkut pineqartassallutik, Naaja Nathanielsen allappoq.

Ukiumut biilinut 200-nut akitsuuteqanngitsunut - taarsiullugu ilanngaat qaffanneqassasoq

Naalakkersuisut naapertorlugit plug-in hybridbiilit ukiumut 200-t eqqunneqartarput, taakkulu tamarmik eqqussinermi akitsuuserneqarsimanatik. Biilit "nalinginnaasut" eqqunneqarneranni minnerpaamik 50.000 koruuninik akitsuuserneqartarput. Biili pisiarineqarnermini 50.000 koruuninik akisuneruppat akitsuut 100 procentiussaaq, biililu 150.000 koruuninik akisuneruppat akitsuut qaffasinnerussalluni.

Inatsisissatut siunnersuut maanna tusarniaassutigineqarpoq, naalakkersuisulli oqaluttuaraa, partiit tamarmik siunnersuummik saqqummiuffigineqarsimasut.

Naalakkersuisunit siunertarineqarpoq, akitsuutinit nutaanit isertitat sulinermi ilanngaammik qaffaanermut atorneqarnissaat:

- Neriuutigaara siunnersuut amerlanerussuteqartunit akuerineqassasoq, isertitakinnerusunummi tamanna iluaqusiisussaallunilu naligiinngitsoqarneranik nalimmassaasussaammat, tamatumunngalu peqatigitillugu aaqqissuussaq pisoqalisimasoq kukkusorlu nutarterneqassalluni, Naaja Nathanielsen allappoq.