Nathanielsen misissueqqissaartoqareersorlu: - Aaqqissuusseqqinnerit aallartissavagut
Pisortat aningaasartuutaannut soorlu peqinnissaqarfimmut aamma siunissami pensionisianut akissaqarumalluni, aaqqissuusseqqinnernik suliaqarnermik aallartitsinissamut tamakkiisumik politikkikkut tapersiisoqartoq, aningaasaqarnermut naalakkersuisoq naliliivoq. Danmarks Nationalbankianit isornartorsiuilluni misissueqqissaartoqareersorlu taama oqariartuuteqartoqarpoq.
Nunatsinni aningaasaqarnermut politikki 'attanneqarsinnaanngilaq, Danmarks Nationalbank misissueqqissaarnermik saqqummiunneqaqqammersumi taama naliliivoq. Pisortat aningaasaqarnerat, innuttaasut ineriartornerat utoqqaat amerliartortussaammata sulisinnaasullu ikiliartortussaanerat pissutigalugit, amigartooruteqarnissanut toqqaannartumik isiginiarnerannik pissuteqarpoq.
Kisianni piffissami aggersumi ajornartorsiutip iliuuseqarfiginissaanut politikkikkut piumassuseqartoqarpoq, aningaasaqarnermut naalakkersuisoq Naaja H. Nathanielsen (IA) oqarpoq.
- Isornartorsiuineq inissaminiippoq, kisianni tamanna ataasiinnaanngitsumit akiorniarlugu sulissutigineqarnera aamma ilumoorpoq, Naaja H. Nathanielsen isornartorsiuinermut akissuteqarluni allappoq.
Nathanielsenip oqarnera naapertorlugu, partiit aningaasanut inatsimmik isumaqatiginninniarnermut atatillugu aningaasaqarnermut politikkimik attanneqarsinnaasumut tunniusimanissamut pingaartitsisoqarpoq:
Nationalbankenimit pitsaanerusoq
- 2023-mut aningaasanut inatsist missingersuutinut inatsimmi inatsisit nutaat tunuliaqutigalugit suliarineqarmat aamma missingersuutinik atortussanngortitsinermi. Tassa imaappoq, pisortani aningaasartuutit ineriartornerinik qummut killiliilluni.
- Politikkikkut sulianut ingerlatassatsinnut tamakkiisumi tapersersuisoqartoq isumaqarpunga, isumaqatigiissuteqarfiusullu maanna siumut ingerlanneqassapput, Naaja H. Nathanielsen allappoq, imalu inerniliilluni:
- Tamannalu tunuliaqutigalugu Nationalbankenimit pitsaanerusumik inissisimallunga isumaqarpunga. Aaqqissuusseqqinnernillu aallartitsinissarput isumaqataaffigilluinnarpara.
Naalakkersuisut aalisarnermik inuussutissarsiornermut salliusutut inissisimasumut saniatigut sanarfisaqarnissartik sulissutigigaat, Nathanielsenip tassunga atatillugu oqaatigaa, taamaaliornikkullu aningaasaqarnermik ilisimasallit innersuussutaat malinneqartut. Tassani ilaatigut mittarfinnut aningaasaliinerit takornariaqarnermut iluaqutaasut kiisalu imermik nukiliuutit mingutsitsinnginnerulernissamut siuarsaanissaq oqaatigai.
Ineqarnermut akileraarummik atulersitsisoqassava
Nationalbankenip misissueqqissaarnermini ullumikkut sulinermit isertitanut, nioqqutissanut eqqussukkanut aamma aalisakkanut qalerualinnullu annertuumik akitsuuteqartoqartartoq tikkuarpaa, ineqarnermullu akitsuusersuisoqanngitsoq.
Ineqarnermullu akitsuutinik atulersitsisoqassanersoq, politikkikkut isumaqatiginninniarnertigut aalajangerneqarumaartoq, Nathanielsen oqarpoq, tassanilu arlallit isiginiarneqassapput:
- Pisortat inissiaataannut utaqqisunut allattorsimaffiit sumiiffiit ilaanni takitillugit, innuttaasut pisinnaatillutik nammineq ineqarsinnaanissaat pilerinartuutissallugu pingaaruteqarpoq. Tamannalu pilerinartuussaaq. Aammalu inissianik piginnittut tamarmik aningaasaatilissuunnginnissaat.
Nationalbankenip isornartorsiugaasa ilagaat ikummatissanut uumassusilinneersunut akitsuutit, aningaaseriviup appasinneragai. Tamanna pillugu Naaja H. Nathanielsen ima oqarpoq:
- Ikummatissanut akitsuutit qaffanneqarnissaa Naalakkersuisut pilersaarutiginngilaat, ingammik innuttaasunut inuussutissarsiortunullu qanoq sunniuteqarnissaat misissoqqaartinnagit.