Naternami ukiuunerani umimmanniarneq ammaateqquneqartoq
Naternami Kommune Qeqertamiittumi ukiuunerani umimmanniarneq ammaanneqartariaqartoq, kommunalpolitikeri piniartullu isumaqarput. Tamannalu qularnartoq Aalisarnermut Piniarnermut Nunalerinermullu Naalakkersuisoqarfik ilimasaarivoq
Naternami Qeqertarsuup Tunuata kujasinnerusortaani Kangaatsiallu eqqaani killeqarfeqartumi ukiuunerani umimmanniarneq matoqqatinneqartarpoq.
Piniartulli neqissaqarniarnerat aningaasanillu isertitaqarsinnaanerat qulakkeerniarlugu, minnerunngitsumillu takorniarianik piniariarititsisarneq atuutilersinniarlugu, ukiuuneranili umimmanniarneq piaartumik ammaanneqartariaqartoq, Kommune Qeqertalimmi kommunalbestyrelsimut ilaasortaq, Kristian Jerimiassen, IA, isumaqarpoq. Taannalu piniartunit tapersorneqarpoq, aviisi Sermitsiaq allappoq.
Aalisarnermut Piniarnermut Nunalerinermullu Naalakkersuisoqarfimmiit saaffiginnissut tiguneqareerpoq, kissaatigineqartulli piviusunngortinneqarnissaa naatsorsuutigineqanngilaq.
Immikkoortitsineq
Aqutsiveqarfik Qaanaami Avannaata Kommunianiittumi, aqutsiveqarfinni Maniitsumi Sisimiunilu Qeqqata Kommunianiittuni, kiisalu Tunumi Ittoqqortoormiit eqqaanni, ukiuunerani umimmanniarneq ammatinneqartarpoq. Sumiffinnilu taakkunami ukiuunerani umiammanniarneq ammatinneqarmat, aamma Naternami ammatinneqartariaqaraluartoq, Kristian Jerimiassen isumaqarpoq.
Aasiannut Qasigiannguanullu takornariat amerlanngitsuinnaat tikittarput. Ukiuuneranili umimmanniarneq periarfissaalertuuppat, takornarianik umiammanniartitsisarneq aningaasarsiutaallualersinnaagaluartoq, taanna isumaqarpoq.
– Ukiuunerani matoqqatitsineq ilisimatuussutsikkut tunngavissaqartinneqanngilaq, taamaattumik tamanna immikkoortitsinertut isigineqartariaqarpoq, taanna oqarpoq.
Pisassiissutillu amerlineqarnissaat siunertarineqanngippat, aasakkut ukiakkullu umimmanniarnermiit pisarineqanngitsoortut ukiuunerani umiammanniarnermut nuunneqarnissaat, taassuma kissaatigaa.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: