nuna ikuallattoq
Nasuttuumi annertooq ikuallappoq
Nassuttuumi ikuallannerup siaruaannissaa annertummat Qaasuitsup Kommuniani Annaassiniartartut qamiterinissamut ikiorneqarumavoq
Qaasuitsup Kommuniani Annaassiarniartartut najukkamilu politiit ikuallannerup siaruaatinnginnissaanut periarfissat pingasunngornermi Nassuttuumut misissoriartorsimavaat.
- Nassuttuup 1/8-rarterutaa ikuallassimasoq satellitsikkut assilisat kingulliit paasinarsitsippaat. Ikuallannerup siaruaakkiartornera assimi takuneqarsinnaavoq. Piffissami matumani piffiup sinaa ikuallappoq. Assimi kajortuuvoq qeqqaniillunilu, nunalu 12 kvadratkilometerisut annertugisoq nunguilluni ikuallassimavoq, Qaasuitsup Kommuniani Annaassiniartartut, Ilulissani politiit aamma Qaasuitsup Kommunia tusagassiuutinut nalunaarummi allapput.
Ikuallannermit pujoq 1264 meterisut portutigisimasoq, paasissutissiarineqarpoq.
Navianartorsiortoqanngitsoq
Alapernaarsuineq tunngavigalugu Qaasuitsup Kommuniani peruluttoqarsimatillugu sulisuisa sisamanngornermi ikuallannerup siaruaatinnginnissaa pillugu annaassiniartartut ornigutsinneqassasut isumaqatigiissutigaat
- Piffinni arlalinni pujoq iluaalliortitsisinnaasoq, kisiannili inunnut, uumasunut piffinniluunniit illunut navianartorsiortitsinngitsoq alapernaarsuinermi paasineqartoq, Qaasuitsup Kommuniata paasisimavaa.
Piffik panertorujussuuvoq naggorikkunnaarsimallunilu, taamaamma uumasut piffimmut allanukarsinnaanerat ilimagineqarpoq, tusagassiuutinut nalunaarummi oqaatigineqarpoq.
Qaasuitsup Kommuniani Annaassiniartartuisa ikuallattumut akiuiniarnissamut ikiortissarsiorput, ikuallattummi siaruaannerata annertunera pissutaalluni atortunik annertuunik sulisunillu amerlasuunik pisariaqartitsiviuvoq.