Nassuiaat: Ammaaqqinneq imatut ingerlanneqarsinnaavoq
Inatsisartut ullumi aqqanersut ataatsimiilerpata, oqaluuserisassaq ataaseq immikkut ittoq tamanit eqqumaffigineqassagunarpoq. Nunamik ammaaqqinnissaq.
nal. 07.36 iluarsisaq. Ammaannermi immikkoortut aappaat ulluni 14-ini mattuteqqasorqarnissaanik ilaqanngilaq.
Naalakkersuisut nassuiaat ataasinnngormat tamanut saqqummiuppaat, nassuiaat nunarsuup sinneranut ammaaqqinnissap qanoq ingerlanneqarnissaa Inatsisartut oqaluuserissavaat. Nassuiaammi corona ajornartorsiutaalermalli suliniutit arlallit atuutsinneqalersimasut allaaserineqarput.
Nassuiaatip imarai, coronap aningaasaqarnermut, peqqissutsimut inuaqatigiinnillu sunniutai.
Nassuiaat atuaruk UANI
Sapaatip akunnerani kingullermi Naalakkersuisut ammaanissamut periusissat pingasut saqqummiuppaat. Tassunga atatillugu Kim Kielsenip Inatsisartuni ilaasortat periarfissippai, Naalakkersuisut ammaanermi immikkoortoq siulliup qaqugu aallartinneqarnissaanik aalajangertinnagit, oqallinnissaannut ilanngussaqarnissaannullu.
Nassuiaatip saniatigut Naalakkersuisut Siulittaasuat saqqummiussissaaq qinikkat oqaluuserisassaannik.
- Maannakkut nunarsuarmut avatangiisitsinnut ammarnissap tungaanut qanoq ingerlassanerluta isumaliutersuutiginissaa piffissanngorpoq. Maannakkut sapusiupajaartumik periusissaqalerpugut, upalungaarsimasoqarpoq, attaveqaqatigiinnermut pilersaaruteqalerpoq aammalu qanoq pisoqarsinnaanera piareersimaffigineqarpoq. Taamaalilluni siumut isigisumik ataatsimoorluta pisunut tunngatillugu tassanngaaniit qanoq ingerlaqqissanerluta qimerloornissaa piffissanngorpoq, Kim Kielsen oqarpoq.
Ammaanissamut piumasaqaatit
Saqqummiussissummi Naalakkersuisunit inassutigineqarpoq, siunnersuutigineqarsimasunit tallimaasunit marluk toqqarneqassasut. Ammaanemi immikkoortumut siullermut uku piumasaqaataapput.
Danmarkimiit aallarnissaq sioqqullugu ullut unnuallu 5-it aamma 2-t akornanni misissugassamik tigusineq (piffissamut najukkami misissugassamik tigusinissamut periarfissat apeqqutaapput)
Danmarkimiit tikinnerup kingorna ullut unnuallu 5-it qaangiunneranni misissugassamik tigusineq
Danmarkimiit tikinnerup kingorna ulluni 5-ini misissugassap inernerata paasinissaata tungaanut mattusimaneq
Tikereernerup kingorna ersiuteqarnermi misissugassamik tigusineq .
Ersiuteqarnermi kinguneqaataasinnaasut imatut nalilerneqarput:
Peqqissutsikkut aarlerinartorsiorneq : Akunnappoq
Inuiaqatigiinni nanertuineq : Akunnappoq
Inooqatigiinnermi nanertuineq : Annikippoq
Ammaanissamut piumasaqaat pingaarutilik ataaseq tassaavoq, Danmarkimi tuniluunnerup annikilliartulersimanissaa.
Tunillatsissimasut amerliartulissappata, nunamik ammaajartuaarnissaq inassutigineqassanngilaq, nassuiaammi allassimavoq. Tamatuma saniatigut pingaaruteqarpoq, innuttaasunit paasineqarnissaa ammaaqqinnerup kingunerisaaanik tunillaassuuttoqalersinnaanera, innuttaasullu tamatta ataasiakkaarluta inuiaqatigiinnut akisussaaffeqarnitsinnik takutitsisariaqarnerput, nassuiaammi allassimavoq.
- Nassuerutigisariaqarparput tunillatsinnissamik pitsaaliuinermut akisussaaffiup ilarujussua innuttaasuniimmat. Innuttaasut inassuteqaatinik malinninnerisigut, tunillatsissinnaaneq aarlerinaateqanginnerusussaavoq, taamaalillunilu innuttaasut inassuteqaatit malinngippasigit, aarlerinaateqarnerusussaalluni , siulittaasoq allappoq.
Kim Kielsenip naggasiilluni Inatsisartut ataatsimiittarfianni politikkereqatiminut kaammattuutigaa:
- Naatsorsuutigaara neriuutigalugulu Inatsisartuni ilaasortat pilersitsiviulluartussanik siunnersuuteqassasut. Suliassaq manna politikkikkut suut akuerisinnaanerivut oqallisigalugu aammalu avissaartuuffiusussat tunulliullugit.