Kaos
Nassatalerisut Kastrupimi sulinerminnik unitsitsipput
Kastrupimi mittarfimmi paatsiveerunneqarpoq, arfininngormat ualikkut nassatalerisut suliaminnik unitsitsimmata
Københavns Lufthavnimut tassanngalu angalasut naammagittartariaqarput, nassatatik angerlamut feriarnermulluunniit nassarusukkunikkit.
Arfininngormat ualikkut Novia-mi nassatalerisut Kastrupimi mittarfimmi sulinertik unitsippaat.
– Pissutsit qulaajarnialeruttorpavut, Novia-mi HR-manager Anne Marie Hollender dr.dk-mut oqarpoq.
Suli ilisimanngilaa nassatalerisut qaqugu suleqqilissanersut.
Aamma Københavns Lufthavnimi attaveqarnermik sulisup Anne Munck Mikkelsenip ilisimarpianngilaa suna suliumajunnaarutaanersoq.
Ilisimasatuaraa Novia-mi sulisut nalunaaqutaq 14.20 suliaminnut atatillugu ataatsimiittut.
– Terminal 2-mi kinguleriiaartoqarpoq Novia-p suliarisartagaani aammalu nassatanik tunioraavimmi inuppassuupput.
– Taamaattumik inuit oqarfigisalerpavut nassatatik nassarnagit angerlaannarallaqqullugit kingornalu Novia attaveqarfigalugu, Anne Munck Mikkelsen Ritzau-mut oqarpoq.
Angalasut ilaat Novia-p suliumajunnaarneranik eqqorneqartoq tassaavoq svenskeq Therese Sandberg. Växjö-mut angerlarluni Kastrupimut aqqusaarsimavoq nassatanilu tigusimanngilai.
– Maani paatsiveqarpianngilaq. Inuit nassatat båndianniipput naammaginninnginnertik takutinniarlugu, Therese Sandberg Aftonbladet-ip netaviisianut oqarpoq.
Mittarfimmi nassatalerinerup 40 procentia Novia-p isumagisaraa.
Mittarfimmi ingerlatsiviit katillugit pingasut nassatalerisuupput. Ingerlatsivinnili allani marlunni - SAS Ground Handling-imi aamma Copenhagen Flight Service-mi - sulisut suliaminnik unitsitsinngillat.
Tassa imaappoq Spies-ip timmisartuutileqatigiiffimminik Thomas Cook Airlines-imik timmisartuussineri Novia-p suliaminik unitsitsineranit eqqorneqanngillat, Spies-imi angalasut nassataat SAS Ground Handling-ip isumagimmagit.
Suli ilisimaneqanngilaq suliumajunnaarneq sumik pissuteqarnersoq.
Kastrup-imili 3F juunip qiteqqunnerani suliumajunnaarnermut atatillugu paasissutissiivoq qaangiuttoortarnerujussuit pineqartut. Tamatumalu saniatigut sulisut 220-t missaanniittut qaangiuttoornermut taarsiullugu sulinngiffeqarsinnaasimagunanngillat.
Qaangiuttoornerit katillugit inuit 22-t ukiumut suliaattut annertutigisut katersorneqarsimapput, taamatut allappoq dr.dk.