Nassaat alutornartut: Qiimmattarunnaarnissaq ajornakusoorpoq

Nammineq kajumissutsiminnik suleqataasut suliamillu ilisimasaqartut itsarnitsanik uissuumminartunik assaanermik Sisimiuni ukiup ataatsip missaani suliaqarsimapput. Maannamut atortut 8000-it missaanniittut nassaarineqarsimapput!

Narsannguami nassaat ilaat 3D-inngorlugit takuneqarsinnaapput. Linki iserfissaq Sisimiut Katersugaasiviata Facebookimi qupperneraniippoq.

Oqaluttuarisaaneq Sisimiuni innuttaasut takkuanni maannakkorpiaq qulaajarneqarpoq. Innuttaasut, aammali suliamut ilisimasaqartut, itsarnitsanik nassaat umiartortut angerlarsimaffiata ungasinngisaani Narsannguami nassaat pillugit innuttaasut oqaluttuarmatali alliartuinnavissimasut, qiimmatsaatigalugit ersaartaapput.

Aviisi AG taama allappoq.

- Narsannguani nassaat najukkami oqaluttuarisaanermut pingaarutilerujussuupput, Sisimiuni katersugaasiviup aqutsisua, Dorthe Katrine Olsen, oqaluttuarpoq.

Narsannguami maannakkorpiaq sanaartortoqarpoq, tamatumalu kinguneranik itsarnitsanik nassaartoqarsimalluni. Sanaartorneq ingerlatiinnarneqarpoq, sanaartornermillu ingerlatsisumit attakkut ikiariissitersut assanneqartut qaleriisanngorlugit iliorarneqarnissaat isumagaa, taakkualu misissuataarsinnaanissaat Dorthe Katrine Olsenip neriuutigaa.

- Sioqqanik qaleriissarujussuit misissuataarnissaannut periarfissinneqassaguma nuannaarutigisorujussuussavara, itsarnitsat kusanarnerpaat immikkoortitersinnaaniassagakkit. Sioqqanilu issoq qanoq annertutigisoq takugaangakku imaassinnaavoq piffissap ingerlanerani oqartariaqalersunga ’enough is enough’ - naammalerpoq. Katersugaasivimmi allarpassuarnik suliassaqartut sulisut ikittuinnaavugut, taamaaliorusukkaluarlutalu piffissaq isumalluutillu aamma unammilligassaapput, oqarpoq.

Sisimiut Katersugaasiviat isumalluuterpassuaqanngilaq, taamaattumik innuttaasunik suleqateqarneq nalissaqarsimanngilaq. Innuttaasorpassuit assaanermut alakkaajartortarsimapput, nassaarpassuarnillu assaanermut ikiuuttarsimallutik. Narsannguami ukiumi ataatsimi Nunatta Katersugaasiviata Allagaateqarfiatalu suliaqarsimanerani atortut 8000-it missaanniittut nassaarineqarsimapput.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS