Narsarsuup ukiuni 80-inngortorsiornerani nalliuttorsiorneq
Erfalatserneq, oqalugiarnerit kaagiliornermilu unammisitsineq Narsarsuup katersugaasiviata silataanni nalunaaqutaq pingasuniit misigineqarsinnaapput. Nalliuttorsiornermilu Amerikamiut sinniisortaavat, Joanie Simon Bartholomaus peqataassaaq.
Narsarsuup katersugaasiviani sorsunersuup aappaanniit katersat nutaat nalliuttorsiornermi saqqummersinneqassapput.
- Nalliuttorsiornissatsinnut pilerivunga, nalliuttorsiornissarput nuannersuussussaavoq. Ukiut tallimakkaarlugit Narsarsuup ammarneqarsimanera nalliuttorsiutigisarparput. Maannalu aamma nalliuttorsioqqilernerput, katersugaassivimmi pisortaq Ole Guldager oqarpoq.
Taanna erfalatsinngilaataanni oqalugiartussaavoq saqqummersitsinerlu nutaaq ammartussaallugu.
Nuummi Amerikamiut sinniisoqarfiata nalliuttorsiorneq aningaasaleeqataaffigaa. Joanie Simon Bartholomaus nalliussiffimmi ullaakkut Narsarsuarmut apississaaq.
- Nalliuttorsiornermi najuutissaaq. Katersugaasivimmi saqqummersitat nutaat ammarneqarnerani peqataasaaq, taannalu iluatsillugu kujataani angalaarniarluni aalajangersimavoq. Joanie Qaqortumut pingasunngorpat ingerlaqqissaaq, Ole Guldager oqarpoq.
Takornariat ikinnerusut
Narsarsuaq amerikamiunut 1941-42-llu akornanni sakkutooqarfinngorpoq, taamanilu Bluie West One-mik atserneqarluni.
Amerikamiut kujataani sakkutooqarfeqarsimanerat kujataamiunut sunniuteqarnikuuvoq. København Narsarsuullu akornanni timmisartuusinerit kujataani takornariaqarnermi ineriartortitsisimavoq.
Takornariallu ukiuni kingullerni marlunni amerlagisassaanngillat.
- Ukioq kingulleq takornariaqanngingajavippoq. Ukioq mannalu aamma taamatut isikkoqarpasilerpoq. Tamannalu alianarpoq, kisianni ingerlaqqittariaqarpugut. Taamaammat saqqummersitsineq nutaaq aamma ammarparput, Ole Guldager oqarpoq.
Amerikamiut ukiuni 17-ini Narsarsuami sakkutooqarfeqareerlutik sakkutooqarfik matuaat. Timmisartoqarfit 1957-58 akornanni matuneqarpoq 1959-imilu ammarneqaqqippoq annaasiniartarneq sikorsuaqarneranilu kalerrisaarinerit tassani pilersinneqarput. Tamanna pivoq umiarsuaq Hans Hedtoft umioreersorlu.
Nalliuttorsiornermi akunnittarfimmi nereqatigiittoqassaaq klubbimilu unnussiuaartoqassalluni.