Narsarsuarmiut toqqissisimatsitsinissamut isumaqatigiissuteqarfigineqassanngillat
Narsarsuarmi innuttaasunik sapaatip akunnerata siuliani ataatsimiisitsisoqareersorlu qularnarunnaarpoq Narsarsuarmi innuttaasut toqqissisimatinneqarnissaminnut isumaqatigiissuteqarfigineqassanngitsut.
Borgmester Kiista P. Isaksen innuttaasunut nassuiaavoq nunatsinni innuttaasut arlaannaalluunniit allaniit ajunnginnerusumik inissinneqarsinnaanngitsut, taamaattumillu mittarfik matuneqarpat heliportinngortinneqarpallu Narsarsuarmi innuttaasut nammineertariaqassasut.
Nammineq pigisaminnik illuutillit suliffeqarfiutillillu pigisaat nalikinnerulerpata tuniniarneqarsinnaanngippataluunniit aamma taarsiivigineqassanngillat.
- Taama nalunaarfigineqarnerput nuannarinngilarput, illoqarfiup akunnittarfiani innuttaasunik ataatsimiisitsinermut peqataasut ilaat oqarpoq.
- Borgmesteriusimasumit Simon Simonsenimit ukiualuit matuma siorna neriorsorneqarsimagaluarpugut isumaqatigiissuteqartoqarumaarneranik, taannalu allakkatigut pinikuuarput. Kommunilli politikeriinut innuttaasut toqqissisimanissaat soqutaasimanngilaq.
- Ukiup affaata ingerlanerinnaani Narsarsuarmiut 30-t nooreerput, inuillu arfineq-marluk aamma nuungajalerlutik. Siunissamut neriunaateqartoqanngilaq oqartussallu tatigineqaratik. Illuutit aqquserngillu aserfallalluinnarput, aningaasaliisoqarusunnginnamini, innuttaasut ilaat, kinaassutsiminnik taaserusunngitsut, oqaluttuarput.
Narsarsuup siunissaa kommunimit Inatsisartuniillu ukiaru septembarimi aalajangiiffigineqassaaq. Narsarsuarmi mittarfiup ingerlanneqarneranik tigusinissamut sumiiffiulluunniit allatut atornissaanut aalajangernissamut, Kommune Kujalleq periarfissinneqarpoq. Narsarsuarmilu inuussutissarsiutinik allanik pilersitsisoqarnissaanut maanna tapersersuisoqarnissaa kissaatigineqarpoq.
Narsarsuup mittarfia sulisunik ikinnerusunik sulisoqartillugu heliportitut atulernissaa maanna ilimagineqarsinnaalereerpoq. Qaqortumili mittarfissaq ukiut sisamat qaangiuppata aatsaat naammassineqassaaq, taassumalu tungaanut Narsarsuarmi innuttaasut suliinnarnissaat naatsorsuutigineqarpoq.