Narsarsuarmi innuttaasunik ataatsimiisitsineq iluatsilluartoq
Borgmesteri naalakkersuisorlu Narsarsuarmi innuttaasunik ataatsimiitsinermut 60-it missaannik peqataaffigineqartumut ataatsimeeqataapput, taakkununnga ilaallutik kommunalbestyrelsimi ilaasortat.
Septembarip 15-iani ataatsimeeqataasorpassuit Narsarsuup siunissaa oqaluuserivaat.
Innuttaasunik ataatsimiisitsinermi Kommuni Kujallermi Borgmesteri Stine Egede kiisalu Ineqarnermut Attaveqaasersuutinullu Naalakkersuisoq Erik Jensen, Kommunalbestyrelsimi ilaasortat arlaqartut ilanngullugit takkussimasunut 60-it missaanniittunut aallarniillutik tikilluaqqusipput.
Aallarniutigalugu oqaaseqareermata, inuutissarsiutinut tunngatillugu suleqatigiit Narsarsuarmi inuutissarsiutinut aallartinneqarsinnaasunut siunnersuutitik saqqummiuppaat.
Saqqummiunneqartut innuttaasunit ataatsimeeqataasunit apeqquteqartitsipput, ilaatigut takornarialerinermut mittarfimmullu, sulisartunut aaqqiissutinut aamma sulisunut atugassarititaasut apeqqutigineqarlutik.
Aningaasaqarnikkut atugassarititaasut
Erik Jensenip innuttaasorpassuit takkussimasut isummaminnik kissaatiminnillu saqqummiussinerat nuannaarutigaa.
Innuttaasunik ataatsimiisitsinermi naalakkersuisup maluginiarsimavaa, Narsarsuarmi innuttaasut Naalakkersuisut suliaqarnerannik minnerunngitsumillu suleqatigiissitat suliaqarnerannik naammagisimaarinnittut.
- Kommune Kujallermi attaveqaasersuutinut tunngatillugu suliniutissat pingaarnersiorneqarnissaat pillugu kommunip siunnersuuteqarnissaa, Aningaasanullu Inatsimmi sinaakkutit iluini suliarisinnaanissaat Naalakkersuisut maanna qilanaaraat, Erik Jensen oqarpoq.
Suleqatigiinnissamut ammasoq
Stine Egede isumaqarpoq innuttaasut apeqqutaasa oqaaseqaataasalu takutikkaat Narsarsuarmi inuussutissarsiutinik nutaanik ineriartortitsisoqarnissaanut soqutiginnittoqarlunilu piumassuseqartoqartoq.
Sutigut tamatigut suleqatigiittoqartariaqartoq, illuatungeriillu tamarmik qanimut oqaloqatigiittariaqartut, borgmesteri nassuiaavoq, nangillunilu oqaatigalugu nunaqarfimmi aallarnisaanissami nutaaliornissamilu kommunip inuutissarsiutinik ineriartortitsinissamut ingerlatsivia tapersersuinissami pingaarutilimmik inissisimassasoq:
- Tamatuma saniatigut sumiiffimmi Kujataanilu attaveqaasersuutinik ineriartortitsinissamut suleqataajumalluni Ineqarnermut Attaveqaasersuutinullu Naalakkersuisup Erik Jensenip oqariartuuteqarnera isumalluarnarpoq.
Ingerlariaqqinnissaq
Narsarsuup siunissaa pillugu suleqatigiissitaq ilaatigut Kommune Kujallermit, Ineqarnermut Attaveqaasersuutinullu Naalakkersuisoqarfimmit, Mittarfeqarfinnit, Innovation South Greenlandimit, Sulisitsisunit, Savaatillillu peqatigiinnit sinniisoqarpoq.
Suleqatigiissitaq martsip qaammataaniilli arfinileriarluni ataatsimiissimavoq. Politikkikkut piginnaatitaanini, suliassallu allassimaffiisigut suleqatigiissitamut suliakkiissutaasut tunuliaqutaralugit suleqatigiissitaq sulivoq.
Suleqatigiissitaq pisortatigoortumik 2023-mi decembarip 31-ani atorunnaassaaq, suliassalli siusinnerusukkut naammassisinnaajumallugit suliassat pillugit ataavartumik aalajangiisoqarsinnaanera malillugu aamma sulilluni.