Narsarsuaq: Eqqaavissuarmi ikuallattoq Issittumi Sakkutooqarfimmit ikiusoqartillugu qaminneqarpoq
Narsarsuarmi eqqaavissuaq tallimanngornermi ikuallappoq, qatserisartullu Narsameersut Issittumi Sakkutooqarfimmit ikiorneqartariaqarsimapput.
Tallimanngornermi Narsarsuarmi eqqaavissuaq ikuallammat, Issittumi Sakkutooqarfiup alapernaarsuutaa Knud Rasmussen ikiuukkiartortariaqarsimavoq. Facebookimi taakku taama allapput.
Najukkami qatserisartut nammineerlutik ikuallattoq qamissinnaanngimmassuk, Narsamit tikisitsilluni ikiuiartortoqartariaqarsimavoq.
Sikoqarnera pissutigalugu qatserisartut atortullu sumiiffimmut tikisinniarneranni Issittumi Sakkutooqarfimmit ikiuisoqartariaqarsimavoq.
Sikup unammillernartoqartitsinera
Qatserisartut sisamat kiisalu saniatigut atortussat Knud Rasmussenimut ikineqarput, taakkulu sikup issunera pissutigalugu aatsaat tallimanngornermi unnuap qeqqata missaani Narsarsuarmut tikipput.
Arfininngornermi ullaakkut qatserisartut ikuallattoq qameriaannanngorpaat, Narsarsuarmilu qatserisartut qamisaanermik nammineq suliaqarsinnaasimapput.
- Qatserisartut sivisuumik suliaqarnerminnut nersorneqartariaqarput, Issittumilu Sakkutooqarfiup Kalaallit Nunaanni Politiit suleqatigiilluarnermut aamma pisoq pillugu attaveqatigiilluarsimanermut qujaffigerusuppaat, Facebookimi taama allapput.