Skip to main content

Narsarsuami innuttaasoq: Aliasunneq nassuiagassaanngilaq

Qaqortumi mittarfiliornissaq Inatsisartuni amerlanerussuteqartut akuerimmassuk, Naja Lund Narsarsuarmi innuttaasut arlallit assigalugit aliasuppoq. - Siunissarput sequmippoq, nunanut allanut nuussallunga eqqarsaatigaara, oqarpoq

Kommune Kujalleq borgmesteri Kiista P. Isaksen, Qaqortumi mittarfittaarnissaq pillugu nuannaangaatsiarluni nalunaaruteqarnerata nalaani, Inatsisartuni amerlanerussuteqartut aalajangernerat pillugu Narsarsuarmi misigisaq allarluinnaavoq.

Nunaqarfimmi innuttaasoq, Naja Lund Sermitsiaq.AG-p oqaloqatigaa.

- Neriukkaluarama ullaaq manna pitsaanerussallunga, kisianni naamik. Suli taama misigivunga, nunaqqatikka assigalugit nassuiagassaanngitsumik aliasungaatsiarpunga. Facebookimi soorlu atuaringa, soorlugooq tassa Narsarsuaq bulldozerersuarnik aqqusaalatugineqartoq. Aalajangerneq sutigut tamatigut alianarluinnarpoq, oqarpoq. 

Narsarsuarmi najugallit nikassarneqartut

- Aliasunnitta qaavatigut mittarfittaartussanit nikassarneqarlutalu illaruaatigineqarpugut. Assersuutigalugu Qaqortormiumiit Facebookikkut allaffigineqarpunga aperineqarlunga illumik piserusunnersunga. Nikassarneqaratta aliasunnerput anneruliinnarpoq, akuerineqarsinnaanngitsumik pissusilersorfigineqarpugut. Narsarsuarmiuusugut ataqqineqarnissarput neriuutigeqaarput, Naja Lund oqaluttuarpoq.

Taamaammat Kalaallit Nunaat qimallugu nuunnissani eqqarsaatersuuteqarfigaa.

- Qaqortumut nuussanngilluinnarpunga, suliffimmilluunniit neqeroorfigineqaraluaruma ingerlaannarlunga itigartitsissaanga. Uagutsinnummi tulluartunik aamma Qaqortumi suliffissaqarnavianngilaq. Narsarsuup piuinnarnissaanut assoruussallunga piareersimavunga, iluaqutaanavianngitsorli aamma nalunngilara, taamaammat nunarput qimallugu nuunnissara isumaliutigilereerpara, nunaqqatimmi nooralerpata isigiinnarlugit annernassaqaaq, nassuiaavoq.  

Inuiaqatigiit akiliissanngillat

- Naalakkersuisut erseqqissaapput Narsarsuaq matuneqassanngitsoq. Taama oqarnerat upperaajuk?

- Taama oqaramik Naalakkersuisut piumaannarpaat uagut nammineerluta nuunnerput akilissagipput. Uagut nuunnerput inuiaqatigiit akilissanngikkaat neriuutigaat. Aamma malunnarluinnarpoq malunnanngitsumik matusiartortoqalereersoq, kommunimiimmi Namminersorlutillu Oqartussanit qanoq iliortoqanngereerpoq, akivoq.

- Narsarsuarmut suna pitsaanerpaassava?

- Mittarfeqarfik atatiinnarneqassasoq. Mittarfimmi kujataanut isaariaavoq, takornariarpassuit ukiut tamaasa Narsarsuarmukartarput Narsarsuup kangerlui takusarlugit, savaateqarfinnukarlutik Nanortallilluunniit qaqqai takusarlugit. Takornariat kujataanukarneq ajorput Qaqortumukarlutik. Qaqortumiissimagaangamik peqqissimisarput Narsarsuullu eqqaaniikkusunnerusarlutik. Kujataanukarnissaq ajornarnerulissaaq, Qaqortummi mittarfissaa nunap immikkoortuani mi mittarfiinnaassaaq.

- Tamatta isumaqatigiippugut angallassinermi kiffartuussinissamut isumaqatigiissutit allanngortinneqartariaqartut. Kujataani illoqarfinni tamani mittarfiliortoqartariaqarpoq helikopterillu atorunnaarlugit. Savaatillit ujaraarartalinnik aqqusinniornermik misilittagaqarluarput, taakku suleqatigineqarsinnaapput. Narsap Qaqortullu akornanni ikaartarfiliortoqarsinnaavoq, Narsamiilluunniit ikaartaammik umiarsuaqalersinnaalluni, taamaasilluta kangerluup illuanut Qaqortumut apuuttoqarsinnaalluni, akivoq.

Ataqqineqarnissaq neriuutigaa

Inatsisartulli mittarfiliornissamut maanna aalajangerput. Taamaammat innuttaasunit kissaateqarpoq.

- Qullissani najugaqarnikuusimasut qanoq misiginersugut paasisinnaavaatigut. Narsarsuaq pillugu suli eqqartuisoqanngilaq, sulimi nukissaqannginnatta. Kaammattuutigerusuppara nikassaanerit unitsinneqassasut, ataqqineqassasugullu, Naja Lund oqarpoq.

Suleqatigiissitaq innersuussissaaq

Kommune Kujallermiit tusagassiutinut nalunaarummi Kista P. Isaksen allappoq, Narsarsuup nunaqarfittut inerisarneqarnissaa pillugu kommune siunertaqartoq.

- Narsarsuup nunaqarfittut siunissaata ineriartorteqqinneqarnissaalu Kommune Kujallermiit siunertariuaannarsimavarput. Narsarsuup siunissaa pillugu Narsarsuarmiut peqatigalugit septemberimi suleqatigiissitamik pilersitsisoqareernikuuvoq. Suleqatigiissitaq maanna Qaqortumi mittarfittaartussanngornerup kingorna inassuteqaatiliortussaassaaq, taannalu politikkikkut aqutsisoqatigiinnut februaarimi saqqummiunneqareeriarpat inassutigineqartoq malillugu suleriaqqissinnaanngussaagut, Kiista P. Isaksen allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER