Narsarmi inuit arlallit aallaaneqarsimasut: Politiit aallaasersortoq tigusaraat
Narsami heliportimi pingasunngornermi ualikkut aallaasersortoqarpoq. Arlallit ajoquserput, inuunerminnilli ulorianartorsiortitsinngitsut politiit ilisimatitsipput.
Air Greenlandip oqaaseqaataa ilanngunneqarpoq.
Narsami heliportip nalaani aallaasersortoqartoq politiit pingasunngornermi ualikkut nalunaaqutaq 17.00 missaani nalunaarfigineqarput.
Kalaallit Nunaata Politiivini pigaartut pisortaat Brian Thomsen Sermitsiaq.AG-mut taama ilisimatitsivoq.
- Aallaasersortoq sumiiffimmi sammivinnut arlalinnut aallaasarsimavoq. Tassani inuit marluk eqqorpai, taakkuli inuunerminnik ulorianartorsiortitsinngillat, pigaartut pisortaat ilisimatitsivoq.
Inuit allat pingasut aqerlup aseqqukuinit aamma eqqorneqarput, annertuumilli ajoquseratik.
- Aallaasersortoq maanna tigusarineqareersimanera erseqqissaatigissavara, taamaammat sumiiffimmi ingerlaarnissamut maanna ulorianartoqanngilaq, Brian Thomsen oqarpoq.
Pisoq politiinit maanna misissorneqarpoq, politiillu annerusumik maanna ilisimatitsisinnaanngikkallarput.
Air Greenland pinartoqartillugu ikiuigasuarnermik aallartitaqarpoq
Air Greenland ilisimatitsivoq aallaasersortoqarnerata nalaani qulimiguulik heliportimiissimasoq, taamaattumillu suliffeqarfik pinartoqartillugu ikiuigasuarnermik aallartitaqartut.
- Narsami pisoq quarsaarnaqaaq tupaqqaqaagullu. Maannakkorpiaq sulisutta ilaasuttalu sakkortoqisumik misigisaqartut ikiornissaat pingaarnerpaavoq. Air Greenlandimi upalungaarsimavugut taamaattumillu unnuk manna sulisussanik attumassuteqartunik timmisartumik Narsarsualiartoqarpoq. Sulisut tamarmik ajornartoornermi ikiuupput, pisariaqaqisumik tapersersuillutik. Pisumi eqqugaasut tamarmik eqqarsaatitsinniipput, pisortaaneq Jacob Nitter Sørensen oqarpoq.