Narsaq: Aallaasersortoqarneraniit misissuinerit naammassineqartut
Narsami heliportimi aallaasersortoqareerneranit misissuinerit, aallaasersortoqarnermilu uppernarsaatinik katersinerit Kalaallit Nunaata Politiivisa naammassisimalerpaat. Suliami paasiniaaneq suli ingerlanneqassaaq.
Narsami heliportimi aallaasersortoqareerneranit uppernarsaatinik katersinerit politiini kriminalteknikerit naammassisimalerpaat. Aallaasersorneq sapaatip akunnera kingulleq pivoq. Suliami paasiniaanermik aqutsisoq, Lars Bjerregaard, Sermitsiaq.AG-mut taama uppernarsaavoq.
- Kriminalteknikerit uppernarsaatinik katersinertik sapaatiummat naammassivaat, taamaammat paasiniaaffittut atorsimasoq maanna ammaqqinneqareerpoq. Suliami paasiniaaneq suli ingerlanneqassaaq, Lars Bjerregaard oqarpoq.
Pisoq naatsumik
Angut 20-nik ukiulik sapaatip akunnerani kingullermi sisamanngornermi nal. 14.00 matut matoqqatillugit eqqartuussivimmi sassartinneqarpoq, inatsit tunngaviusoq tunngavigalugu killisiorneqarluni.
Angut Narsami heliportimi pingasunngornermi qulimiguullip missimatsiarnerata kingorna aallaasersorpoq. Aallaasersornermi inuit marluk aqerlunik eqqorneqarput, inuunerminnilli ulorianartorsioratik.
Sermitsiaq.AG-p paasissutissaatai naapertorlugit qulimiguulik aallaasersornermi tallimariarluni eqqorneqarsimasutut putoqarpoq. Suliaq marloqiusamik matoqqasutut paasiniaaffigineqarmat Kalaallit Nunaata Politiivi suliami oqaaseqarusunngillat.
