uran pillugu oqallinneq

Narsami uran ataatsimiissutigeqqilerpaat

Inuit Ataqatigiit sinnerlugit Inatsisartuni ilaasortat pingasut Narsaliarniarput uranimut naaggaarnerminni isumaqatissarsiorlutik

Sara Olsvig isumaqarpoq uran pillugu oqallinnermi innuttaasut peqataatinneqanngippallaartut

Naalakkersuisut isumaliutigaat tikkuussisumik uran pillugu kujataani innuttaasut taasitinneqassasut. Maanna Inuit Ataqatigiit sinnerlugit inatsisartuni ilaasortat pingasut Narsaliarput uranimut naaggaarnertik illersoriartorlugu.

Sara Olsvig, Kalistat Lund aamma Aqqaluaq B. Egede sisamanngornermi unnukkut Narsap katersortarfiani ataatsimiisitsiniarput. Taakku isumaqarput uran pillugu isummernissamut tunngavissat naammanngitsut.

- Maanna Inatsisartutigoortumik ulorianartunik qinngornilinnik uranimik aam-ma aatsitassanik qinngornilinnik piiaasarnermik attueqqusinngilluinnarnerup atorunnaar-sinnissaannik aalajangiisoqarnissaanut tunngatillugu innuttaasunik peqataatitsisoqarsi-manngilaq. Isumaqavippugut suleriuseq killormoortoq eqqunngitsorlu atorneqartoq. In-nuttaasut pitsaasumik ilisimatinneqaqqaartariaqarput, tamatumalu kingorna tusarniaa-soqartariaqarpoq kingornalu aatsaat aalajangiisoqarluni. Pissanngatigaara, qanoq Nar-sarmiut Naalakkersuisut oqariartuutigisarsimasaannut qisuariaateqassanersut, Sara Olsvig oqarpoq.

Uranimut naaggaarluinnarnerup atorunnaarsinnissaanik pilersaarut Danmarkip Nunatta akornanni politikkikkut isumaqatigiinnginnermik pilersitsivoq, tassami akuutissiaq taanna radioaktiviusoq sillimaniarnermut nunanullu allanut politikkimik attuivoq tamannalu Danmarkip naalagaaffeqatigiit sinnerlugit oqartussaaffigaa.

- Isumaqarpugut, uranisiornissamik uranimillu annissuinissamik kissaateqarneq pilersaaruteqarnerlu eqqarsaatigilluagaanngitsut. Kialluunnit ilisimanngilai, uranisiornerup aningaasaqarnitsinnut, allaffissornermut, peqqissutsimut, sillimaniarnermut, avatangiisinut kiisalu nunanut allanut attaveqarnitsinnut kingunissai. Tamakkulu ilaatigut Narsami innuttaaqatigut peqatigalugit oqaloqatigiissutigisariaqarpagut, Aqqaluaq B. Egede oqarpoq.

Kujaani annertuumik suliffissaaleqisoqarpoq suliffiillu aatsitassarsiornermi pilersinneqarsinnaasut assut amigaataapput.

- Nunat immikkoortuinit periarfissagissaarneroqaagut, toqqagassaqarpugullu. Uranisiornissamut naaggaarsinnaavugut, taamaakkaluartorlu suli inuussutissarsiornikkut ineriartorfissaqarluarpugut; suliffissanittaaq pilersitsisussanik. Uranisiornissamut akuersaarutta, tamanna nunaateqarnermut uumasuuteqarnermut minnerunngitsumillu takornariaqarnermut sunniinerluttussaavoq. Narsami innuttaasut oqariartuutigisassaat qi-lanaaraakka, Kalistat Lund oqarpoq.

Powered by Labrador CMS