Narsami innuttaasut akerliusut: Ineriartorneq allanngortinneqarli!
Kujataani atugassarititaasut pitsaanngillat. Narsami ullumi akerliussutsimik takutitsinissamik aaqqissuisut taama isumaqarput. Taakku kissaatigaat kujataa tamakkerlugu ineriartortinneqassasoq, Qaqortuinnaanngitsoq. Borgmester Kiista P. Isaksen Sermitsiaq.AG-mut ilisimatitsivoq akerliussutsimut takutitsinissamut aggersarneqarsimanani, taamaattumillu periarfissaatillugu takkussinnaasimanani. Oqaloqatigiittoqarnissaali kissaatigaa.
Kujataa tamakkerluni ineriartortinneqartariaqarpoq, ammuinnaq ingerlaneq illuatungaanut aallarniassammat.
Narsami akerliussutsimik takutitsinissamik aaqqissuisut taama isumaqarput.
- Innuttaasut noorarput. Suliffissaqanngilaq, inissiallu nutaanngilisut akisoqaat. Illoqarfipput ukkatarisariaqarparput, pitsaasumillu ineriartortilerlugu, Susanne Lynge, aaqqissuusseqataasoq taama oqarpoq. Taanna Narsami suligasuartuni peqataavoq, Narsap pitsaasumik ineriartornissaannik suliaqaqatigiiffimmi.
Taanna nassuiaavoq innuttaasut isumaqartut borgmester Kiista P. Isaksenip (S) Qaqortoq pingaartinnerugaa.
Innuttaasut ikiliartortut
Narsami innuttaasut 2019-imi 1.374-iupput. 1. januar 2020 ikiliallassimapput 1.346-gamik. Tassa Narsap innuttaasui ukiup ataatsip ingerlanerani 38-nik ikileriarsimapput.
Qaqortumi innuttaasut amerliallassimapput. 2019-imi 3.012-iupput, januaarilli aallaqqaataani 2020-mi 3.050-iullutik.
- Qinersisoqarneranit ukiut pingasunngorput, suli allanngortoqanngilaq. Kommunip utoqqaat meeqqallu sumiginnarpai. Uagullu uninngaannarluta sumiginnaaqataaginnarsinnaanngilagut. Akisussaaffimmik tiguserusuppugut, suliaqarusuppugut, Susanne Lynge oqarpoq erseqqissarlugulu suligasuartut kissaatigigaat Narsami innuttaasut ineriartornermut suleqataanissaat.
Periuseq pillugu borgmester ugguarpoq
Narsami ullumi nalunaaqutaq 16.30 akerliussutsimik takutitsisoqarpoq. Inuit 40-t missaat ingerlaaqatigiipput.
Sermitsiaq.AG-p Narsami innuttaasut isornartorsiuineranik Kiista P. Isaksen ilisimatippaat. Taassuma Facebookimi qisuariaatigisimasani innersuuppaa:
- Uggoraara oqariartorfiginiakkasi toqqarlugit aggersannginnassigit, oqaloqatigiinikkut eqqartueqataarusunnaraluaqimmat.
- Ineriartorneq pisortaqarfiit aap akisussaaqataaffigivaat, kisimiisinnaangillalli, innuttaasut peqataalluinnartariaqarput, allappoq.
Kiista P. Isaksen qisuariaammini erseqqissarpaa Kommune Kujalleq kujataani illoqarfiit inerisarlugit suliaqarsimasoq, pineqartutut Qaqortuinnaanngitsoq.
Erseqqissaatigaa coronap ajornartoortitsinera qaangiuppat Narsaq, illoqarfiit nunaqarfiillu allat tikikkusullugit.