Narsami innuttaasunik ataatsimiisitsinissaq siulleq taamaatiinnarneqarpoq
Silap suli anorlingaatsiarnera pissutigalugu Namminersorlutik Oqartussanit, Aarhus Universitetimit aamma Greenland Mineralsimit ataatsiimeeqataasussat Narsami ataatsimiisitsinissamut siullermut Qaqortumiit ingerlariaqqissinnaanngillat. Unnummut arfineq-marlunut ataatsimiisitsinissaq pilersaarutaasutut ingerlanneqassaaq.
Kuannersuarni aatsitassarsiorniarneq pillugu Kujataani innuttaasut pilersaarutaasumik ataatsimiisinneqarnissaat silamit akornuserneqaqqippoq.
Sakkortuumik anorlernera pissutigalugu qulimiguulik Qaqortumiit Narsamut pilersaarutaasoq malillugu ingerlasinnaanngilaq. Pisortanit ataatsimiigiartitat piaarnerpaamik imaatigut Narsamut ingerlanneqarnissaat isumaqatigiissutigineqarsimavoq, ualimulli marlunut ataatsimiisitsinissaq angumerineqarsinnaanngilaq.
Pilersaarutaagaluarpoq illoqarfinni nunaqarfinnilu katillugit aarfineq-marluusuni ataatsimiisitsisoqassasoq, sakkortuumilli anorlernerata kinguneranik Qassiarsummi Igalikumilu ataatsimiisitsinissat taamaatiinnarneqarsimapput, maannalu Narsami ataatsimiisitsinissap aappaa silarlunneranit aamma eqqugaavoq.
Naalakkersuisut ilisimatitsissutigaat, politikkerit qaqagu Kujataanukarlutik innuttaasunik ataatsimeeqateqarnissaat pilersaarusiorneqartoq.
