Narsami ilisimatuut illuutitaartinneqartut

Narsami ilisimatuut illuutitaartinneqarneranni ilisimatuut misissuiartortut innuttaasullu imminnut qaninnerulernissaat anguniarneqarpoq.

Sumiiffimmi ilisimatuut misissuiartortillugit paasisat najugaqartunit iluaqutigineqarsinnaasariaqarput.

Storbritanniami Sheffiel Hallam Universitymi, eqqumiitsuliornermi, ilusilersuinermi nutaarsiassialerinermilu ilisimatusarfimmi pisortaq professorilu, Lise Autogena taama isumaqarpoq.

Taassuma pisortanit aningaasalersugaanngitsumik Narsami nunarsuaq tamakkerlugu ilisimatusartut illuutissaanik pilersitsisoqarnissaa sulissutigalugu iluatsippaa. Narsamiinnermini maluginiarsimavaa ilisimatuut arlallit illoqarfimmiittartut, ilisimatusarnermili paasisat najugaqartut ungasilluinnagaanni saqqummiunneqartarlutik.

Arctic Hub tusagassiorfinnut nalunaaruteqarlutik taama allapput.

Najugaqartut ilisimatuullu qaninnerulissasut

Narsap eqqaani aatsitassarsiortoqaratarsinnaanera ukiuni kingullerni eqqummaariffigineqarnerulermat ilisimatuut nunarsuarmit tamarmeersut tikittalerput. Paasisalli innuttaasunit arajutsineqartarlutik.

Ilisimatuut illuutaannik pilersitsinermi ilisimatusarnermit paasisat allaatigineqartut innuttaasunit angujuminarnerulissapput iluaqutaasinnaallutillu.

- Ilisimatuutut misissuivigineqartut annersaat innuttaasunut iluaqutaangaarsimanngillat. Taamaattumik takorloorparput Narsaq International Research Station ilisimatuut avataanit tikittut Narsami innuttaasunut attaveqalissutigissagaat misissuivimmilu ilisimalikkat innuttaasunuttaaq iluaqutaanissaannik qulakkeerutaassasoq, Lise Autogena oqarpoq.

Ilisimatuut misissuiviat allagaataasivittut atortassaaq, saqqummersinneqartullu innuttaasunit atuarneqarsinnaassallutik. Lise Autogenap neriuutigaa taama pilersitsinermi ilisimatuut, nunaqavissut, ilinniarfiit suliffeqarfiillu suleqatigiinnerat aamma nukittorsarneqassasoq.

Powered by Labrador CMS