Narsami eqqissisimasumik inuiattut ullorsiortoqarsimasoq
Silagikkaluaqisoq innuttaasut amerlavallaanngitsut aaqqissuussanut peqataasimapput, puisinniuteqqaartoqarnera ornigarluarneqartoq eqqaassanngikkaanni.
Ulloq pisarnertut erfalasumik amusinermik aallarnerneqarpoq, tassani kommunalbestyrelsimi ilaasortaq Josef Petersen innuttaasunut amerlanerpaamik qulit aqqaneq-marlullu akornanni takkussimasunut sivisulaamik oqalugiarpoq, innuttaasut takkussimasut saniatigut "inuppassuarnut" akuupput erinarsoqatigiit affaat kommunalbestyrelsimilu ilaasortat pingasut.
Nalunaaqutaq qulinut umiatsiat 15-it puiseqqaanniunnerat allartinneqarpoq. Nalunaaquttap akunnera ataaseq minutsillu aqqanillit qaangiummata, Peter "Piiteraq" Mikaelsen ajugaasuulluni tikippoq, Angutitsiaq Isbosethsen siorna ajugaasoq ukioq manna puiseqqaanniunnermi tulliulluni, minutsi ataasiinnaq kingulliulaarluni tikippoq.
Puisimik pisaqaqqaanniunnermi siulliit arfinillit tikittut pinnatasinneqarput, illoqarfimmi pisiniarfit suliffeqarfiillu aningaasaliiffigisaannik, kiisalu kommunip aningaasanngorlugit tunniussaannik.
Nalinginnaasumik katersortarfiup ataaniittumi Kuukasiup eqqaani inuppassuit nerisassiortarput. Puiseqqaanniunnermili neqimik akeqanngitsumik pissarsisoqarsinnaagaluartoq, ilaqutariit imminnut ungasillutik nerisassiorput. Kujataani inuiattut ullorsiornermi silageqisoq puisip neqaanik uutartuuttoqarluni nuannisartoqarluarpoq.