Narsaq
Narsami atuarfik paatsiveqanngitsoq
Narsap Atuarfia atortunik, ilinniartitsisunik ininillu atuartitsiviusunik amigaateqarpoq, ilinniartitsisullu kipiluttunartorsiortut pissutsinik taamaattunik atuarfiup nutaap qaammatit arlallit qaangiuppata ammarnissaata tungaanut atugaqaannartariaqassagunarput
Narsap Atuarfiani pissutsit atuarfeqarnikkut kanngunartuliatut isikkoqaleriartuinnarput, atuartut angusinngitsoortalerlutik, ilinniartitsisut aqutsisullu kipiluttunartorsiorlutik aalajangiisartullu atuartitsineq naammattumik pitsaassusilik qulakkeerniarlugu piaartumik akuliunnissamut pisariaqartunik aningaasassaqaratik.
Atugassarititaasut
Killiffik 2016-imi sapaatip-akunnerata ataatsip ingerlareernerani taamaappoq – taamaalinerani pissutsit isornarluinnartut ukiuni arlalinni atuutereersimapput illoqarfiullu atuarfia nutaaq pilersaarutit naapertorlugit ukioq manna atorneqalissalluni.
Kisianni ajunnginnerpaamilluunniit pisoqaraluarpat atuartut atuarfimmut AG-p iluata radoneqarneranik qulaajaanerata kingorna 2013-imi isaterneqartumut sanilliullugu avatangiisini toqunar- toqanngitsuni, qaamasuni nutaaliaasuni atuarsinnaalernissaannut qaammatit arlallit ingerlaqqaassapput.
- Narsap Atuarfia ilungersunartunik atugassaqartitaasimavoq, tamannalu atuarfik qimallugu nuuttariaqalersimanermini paasinarpoq. Atuarfiup allilerneqarnerata suliarineqarnera siuariartortoq qujanartumik takusinnaavarput, atuarfiullu illutat nutaat pilersaarutit naapertorlugit upernaap ingerlanerani atulissavai, Kommune Kujalliup borgmesteria Jørgen Wæver Johansen, juullinngitsiartoq Narsamut tikeraartoq ilaatigullu illoqarfimmi ilinniartitsisunik ataatsimeeqateqartoq, oqarpoq.
Isornartorsiuineq
Taassuma pissutsit maannakkorpiaq pitsaavallaannginnerat tamatuma peqatigisaanik nassuerutigaa, pissutsillu sivisuumik oqallisigineqareersullu borgmesteri tikeraarsimalluni.
Ilaatigut ilinniartitaanermut naalakkersuisup Nivi Olsenip Narsap Atuarfianik nunatsinni agguaqatigiissillugu angusat appasinnerpaanerat tunngavigalugu tamanut ammasumik isornartorsiuinerata kingunerisaanik.
Taanna oqaaseqaatini pillugit sakkortuumik isornartorsiorneqarpoq, ilaatigut Kommune Kujallermit atuarfiullu aqutsisuinit, atuarfimmi atugassarititaasut ajorluinnartuunerannik erseqqissaateqartunit.
Allaaserineqartoq AG-mi atuarneqarsinnaavoq. Aviisi uani pisiariuk: