Narsami atualertoqarnerani atuartut aatsaat taama ikitsigisut
Narsami atualerlaat siornatut taamaallaat 15-it aallartipput, aamma Narsap Atuarfiani atuartut amerlassusaat 15 procentit missaanni appariarsimapput
Tallimanngornermi nalunaaqutaq 11.00 atuarfiup pisortarigallagaata Hans Peter Brobergip atualertut angajoqqaavilu tikilluaqquaat. Atuarfimmi ilinniartitsisut atuartitsinissaq peqqissaarlutik sivisuumik piareersarsimagaat ilaatigut oqaatigaa, atuartunillu angajoqqaat suleqatigalugit atuartitsinissaminnut qilanaartut.
Tamatuma kingorna Qaalermat Qungujupput ataatsimut erinarsorluni atorneqarpoq, kingornalu atualerlaat ilinniartitsisutit, Dorthinnguaq F Durhuus aamma Martin Egede ilassivaat, erfalasuunnapput, siullermeerlutillu klassiminni atuarlutik.
Ilinniartitsisut arfineq-pingasut amigaataasut
Siornatut atualerlaat 15-iusut atuarfiup pisortarigallagaata Hans Peter Brobergip oqaluttuaraa, kisianni atuarfiup atuartui tamarmiusut 15 procentit missaanni ikileriarsimapput, siorna 230 missaannit, ukiumi nutaami atuarfiusumi 195-it missaannut.
Narsap Atuarfiani maannakkorpiaq ilinniartitsisut arfineq-pingasut amigaatigineqartut ilanngullugu oqaluttuaraa, kisianni atuarfik timelærerinik pitsaasuni taartissanik pissaarsisimavoq, taamaattumillu atuartitsineq illersorneqarsinnaasoq isumaqarluni.