Narsami aallaatittoq: Pisoq sukkangaarmat ersilerianngilagulluunniit

Narsami angut 20-nik ukiulik pingasunngormat sumut tamaanga seqqortarluni aallaasersormat, inuit marluk aallaaneqarlutik eqqorneqarput. Jan Hansen pisumi aallaatippoq.

Pisoq qulimiguulimmi ilaasunit, takunnittunit qulimiguulimmilu aquttumit assigiinngitsorujussuartut misigineqartoq, taanna oqaluttuarpoq.

Jan Hansen pisumi annilaangalinngitsoorpoq, tupaqqalernissaalu suli malunniutinngitsoq, Nuummi napparsimmavimmi uninngavimminiitsilluni tallimanngornermi ualikkut oqaluttuarpoq.

- Qulimiguulik missimatsiartoq siorsuusattunik tusaasaqalerpunga, aquttarfillu seqummakoqartoq takuara, qulimiguulimmillu aquttup kiinaa aagasappoq.

Qulimiguulik akornuteqalersorigaa

Jan Hansen Narsarsuarmiit Narsamut angerlassalluni ullualunni kinguaattooqattaartariaqarsimavoq, qulimiguulik teknikkikkut akornuteqarnera pissutigalugu. Qulimiguuliullu ilaaffigisaata aquttarfia seqummakoqalermat, Jan Hansen eqqarsarpoq qulimiguulik akornuteqalersimasoq. Aallaasersortoqarneranik eqqarsarianngiivippoq.

- Aquttarfiup atortui akornuteqalersut taamaallaat eqqarsarpunga, taamaattumillu annilaangarianngiivillunga. Annilaangalersimassagaluarpunga nalusimanngitsuugukku seqqortaarfigineqarluta.

Jan Hansen oqaluttuarpoq aquttup aappaata qulimiguuliup matua ammarsimagaa, ilaasullu peqatigalugit qulimiguulik qimapassallugu arpalersimallutik.

Aallaatissimalluni paasileraa

Jan Hansen qaqqajunnamut arpappoq, qulimiguulillu 30-50 miiterisut ungasitsigilereerlugu nulumigut sakkortoorujussuarmik annialerpoq.

- Tassani suli isumaqarpunga qulimiguulik qaarsimasoq, aseqqukuisalu tamminnerminni eqqorsimagaannga. Niukkulli anniarpallaalerama quip tunuanut paarngorlunga toqqorpunga, tassanilu qulimiguullip tungaanut qiviarama takulerpara angut qulimiguuliup eqqaani aallaseqarluni nikorfasoq.

Jan Hansenip tassanerpiaq paasivaa susoqarnersoq.

- Paasilerpara aallaatissimallunga. Eqqarsaateqarpallaanngilanga tassani, aammalu iluamik ersilernanga.

Taassuma ilaaqatimi ilaat kingorna oqaloqatigisimavai. Ilaaqataasut sukkanerullutik arpassimagamik aallaaseqartumik takusimanngillat.

Pilattartissagami Nuummukaanneqartoq

Jan Hansen qulimiguulimmilu ilaasut allat arlallit, taakkunani nakorsaq peqqissaasorlu qulimiguulimmi aamma ilaasuusimasut, ambulancemut ikineqarput ingerlanneqarlutillu.

Jan Hansen maanna Nuummut tikissimalerpoq, pilattartillunilu suliaritinnissaa tullernguuppoq.

- Nulunni aammik katersuuttoqangaatsiarsimavoq, tarrarsortikkamalu takusinnaavara aqerlup aseqqukui arfiniliugunartut suli nulunniittut. Taakku suliaritinninni piiarneqassapput.

Jan Hansenip nalugallarpaa qaqugu angerlassanerluni. Pisulli sakkortuup kingorna tupaqqanera suli malunniutivissimanngilaq.

- Suli tupaqqasutut misigilinngilanga, immaqa kingusinnerusukkut takkutissaaq.