Narluneq iluatsilluartumik imaanit qaqinneqarsimavoq

Ningittagarsuut Narluneq ukioq ataaseq sinnerlugu kinngoqqareersoq nunamut qaqinneqarsimavoq.

Narluneq 2019-imi septembarip 14-ani Qaqortup eqqaani kinnguvoq, angallallu Iluliaq Seafoodimit pigineqarpoq, Kim Høegh-Damimilu piginneqataasuulluni.

Polar Dive, Nuummi aqqartartutut qaqitsisartutullu ingerlatseqatigiiffiusoq qaqitsisimavoq.

Angallatit marluk inuillu arfineq-pingasut

Klaus Dupont Iversen Polar Divemeersoq qaqitseqataasimavoq, angallatit mrluk Tulu Polar Endeavourilu atorlugit kiisalu sulisut arfineq-pingasut peqatigalugit qaqitsisimapput.

Klaus Dupont Iversenip Sermitsiaq.AG-mut oqaluttuaraa, qaqitsiniartut qassutinik angallammit piiaaqqaarsimasut:

- Ulluni marlunni qassutit piiarneqarput, eqqoriarparalu qassutit syv tonsit missaanniittut piiarneqarsimasut, Klaus Dupont Iversen oqaluttuarpoq.

Qassutit piiarneqareermata, qaqitsisussat angallat imaarniarlugu ussissarsimavaat:

Putut tamarmik matoorneqarsimasut

- Imaanut aqqarluta matut tamaasa matoorpavut putullu tamaasa matoorlugit, Klaus Dupont Iversen oqaluttuarpoq.

Qaqitsiniarlutik suliaqartut tamatuma kingorna angallat pumpe atorlugu imaajarpaat, tassani ulinnera ikiorsiullugu angallat kinngoqqajunnaarsinneqarpoq.

Ulluni marlunni piareersaareerluni angallat Tulu atorlugu Narluneq Sisimiunut kalinneqarpoq, ningittagarsuut maanna BJ Entreprsisimit ingutserneqartussanngorpoq.

Pikkorilluinnartut suliaqarsimasut

Klaus Dupont Iversen naapertorlugu, angallammik kinngusimasumik suliaqareernermi saliisimaneq Namminersorlutik Oqartusasnit akuerineqarsimavoq, taassumau oqaatigaa oqartussanik, piginnittunik sillimmasiisarfimmillu iluatsilluartumik suleqateqartoqarsimasoq:

- Suliaq ajunngilluinnartumik ingerlanneqarpoq, tassan piginnittup sillimmatinut tunngassuteqartut isumagisimavai, angallat taamaalilluni sineriammi umiiarnikut allat assigalugit imaaniiginnarunnaarsinnaasimavoq, Klaus Dupont Iversen oqarpoq.

Sillimmasiisarfimmik isumaqatigiissut naapertorlugu, qaqitsineq qanoq akeqarsimanersoq ilisimatitsissutigerusunngilaa:

- Soorunami angallatit marluk atorlugit sulisullu arfineq-pingasut peqatigalugit suliaqarsimaneq akisuvoq. Tamatuma saniatigut angallatip isaterneqarnissaa aamma akeqartussaavoq, Klaus Dupont Iversen oqarpoq.

Angallatip puttallartinneqarnera videomi matumani takusinnaavat: