Naqqiut: London Mining Greenland aallarteqqittoq

London Mining Greenland A/S pinngitsaaliissummik atorunnaarsinneqartoq, maani nittartakkami allaaserisami siullermi allaqqagaluarpoq.

Paasissutissat Inuussutissarsiornermut Aqutsisoqarfiup CVR-mut nalunaarsuiffianinngaanneerput. Taakkulu eqqortuunngillat, ingerlatseqatigiiffik aallarteqqinneqarmat. Taakku paasissutissat CVR-imut nalunaarsuiffimmi kukkuneq pissutigalugu nutarterneqarsimanngillat.

London Mining Greenland A/S-ip ingerlatsinini nangeqqissinnaagaa, Kalaallit Nunaanni Eqqartuussivik decembarip 16-anni aalajangerpoq.

Ullormi tassani Inuussutissarsiornermut Aqutsisoqarfiup nalunaarutigaa ingerlatseqatigiiffik aallarteqqinneqartoq.

Pinngitsaaliissummik atorunnaarsitsinissamik qinnuteqaat Inuussutissarsiornermut Aqutsisoqarfimmit aggustip 16-anni 2016-imi tunniunneqarpoq. Suliffinnik unitsitsisartoq, Peter Schriver, Nuna Advokatineersoq naapertorlugu, London Mining A/S ukiumut nalunaarusiaq piffissaq eqqorlugu tunniussimanngimmagu tamanna pivoq.

- Tamanna pinngitsaaliissummik atorunnaarsitsinermut qinnuteqarnermut pissutaasoq nalinginnaanerpaasarpoq, Peter Schriver oqarpoq.

Taanna novembarimi eqqartuussivimmit London Mining Greenland A/S-imut unitsitsisussanngortinneqarpoq.

Taamaalilluni ingerlatseqatigiiffik pinngitsaaliissummik unitsinneqarnerani ingerlannissaa tuliassarilerpaa.

Ingerlatseqatigiiffik ukiumut nalunaarummik kingorna tunniussereersimagaluarpalluunnii, Taaamatut pinngitsaaliissummik unitsitsineq imaliaallaannaq atorunnaarsinneqarsinnaanngilaq.

Tamatuma saniatigut aningaasanut tunngasut inissinneqarnissaat piumasaqaataavoq, tassa imaappoq, ingerlatseqatigiiffiup nammineq aningaasaatini naammattumik uppernarsartariaqarpai.

- Saniatigut aningaasaliissuteqartoqarnissaanik tamanna kinguneqakkajuttarpoq, uanilu taamatut pisoqarpoq, eqqartuussissuserisoq Peter Schriver nassuiaavoq.

London Mining Greenland A/S ukiaq Kinamiut suliffeqarfiutaannit General Nice Groupimit ingerlatseqatigiiffiutaat General Nice Development Ltd aqqutigalugu tiguneqarpoq. Tamanna ingerlatseqatigiiffiup piginnittuusimasup London Mining Plc. atorunnaarsinneqarneranut atatillugu pivoq. Ingerlatseqatigiiffik Hong-Kongimeersup Isuani suliniummi piiaasinnaanermut akuersissutip tigunera, decembarip 21-anni Namminersorlutik Oqartussat akueraat, tamannalu ingerlatseqatigiiffimmi nalililituaavoq.

Nuup Kangerluata qinnguani suliniutip annertuup aallarteqqinnissaanut tamanna neriuuteqarnermik pilersitsivoq.

- Suliffeqarfiup aningaasaliissutit pisariaqartinneqartut pissarsiarinissaannut periarfissaqarpoq, namminerlu aningaasaatinik aningaasaaliissuteqarnissamut aamma Isukasiani piaanissamut akuersissutip ineriartorteqqinnissaanut saniatigut taarsigassarsinissamut, tigusineq 2015-imi januaarimi nalunaarutigineqarmat, tamanna oqaatigineqarpoq.

Pinngitsaaliissummik unitsitsinerup atorunnaarsinneqarnerani London Mining A/S tamakkiisumik General Nice Development Ltd.-mit pigineqartutut ingerlaqqippoq.