Naqinnernik ilisarsisinnaannginnermik naqissusiisumik suliaqarnissaq ajornakusoortoq
Naqinnernik ilisarsisinnaannginnermik naqissusiisumik misileraammik suliaqarnissamut pisariaqartitat arlalissuupput, suliarlu imaaliallaannangassaanani. Meeqqalli naqinnernik ilisarsisinnaanngitsuunermut aarlerinaateqartut ikiorserneqarsinnaapput, Naalakkersuisoq qularnaarivoq.
Naqinnernik ilisarsisinnaanngitsuunermut naqissusiinissamut misiligutit qallunaanut atorneqartartut nunatsinnut tulluarsaruminaapput, oqaatsit sannai oqaaseqatigiillu allaanerulluinnartut nunatsinni atoratsigit. Taama nassuiaavoq Ilinniartitaanermut Naalakkersuisoq, Katti Frederiksen.
Nalunaarusiami, "Kalaallit Nunaanni atuartunut naqinnernik ilisarsisinnaanngitsunut suliniut"-mi misissuinerup takutippaa 3. klassemi atuartut arfiniliugaangata ataaseq naqinnernik ilisarsisinnaanngitsuunermut ilimanaateqartartoq. Atuartulli atuarniarnermikkut allanniarnermikkullu killiffissiorneqarnerannut misiliutit atorneqartut naqinnernik ilisarsisinnaanngitsuunermut naqissusiisinnaannginnerat, nunatsinni inuit innarluutillit kattuffiata, NIIK-ip siulittaasuata naammagisimaanngilaa. Naqissusiisinnaanngikkaannimi ikiuuteqalernissaq killeqarsinnaammat.
Ikiorneqarsinnaapput
Naqinnernilli ilisarsisinnaanngitsuusutut naqissuserneqaqqaanngikkaluarluni, atuartoq ikiorserneqarsinnaavoq.
- Nunatsinni ajornartorsiutilinnut ikiorsiiniarnerit eqaannerusutut ipput, tassami misiligutit naqissusiisut utaqqinngikkaluarlugit Atuarfimmut inatsimmi allaqqavoq atuartut immikkut pisariaqartitallit immikkut isiginiarneqassasut ikiorserneqarlutillu, Ilinniartitaanermut Naalakkersuisoq Katti Frederiksen allakkatigut akissuteqarluni ilisimatitsivoq.
Unammilligassat arlaqarput
Katti Frederiksen nassuiaavoq nunatsinnut tulluarsakkamik naqinnernik ilisarsisinnaanngitsuunermut naqissusiisinnaasup misiliguteqalernissamut nunarput arlalitsigut amigaateqartoq. Oqaatsit sannamikkut allaanerunerat kisimi pineqaannanngilaq.
Aammali nunatsinni naqinnernik ilisarsisinnaanngitsuunermut tunngasumik suliaqarfimmik, atuartut atuartariaasiannik killiffiinillu tunngasunik ilisimasanik, nunatsinnilu naqinnernik ilisarsisinnaanngitsuunermik ilisimatusartunik soorlu aamma suliani sulisussanik amigaateqartoqarpoq.
- Uani suliniummi pasitsaassiniutinik ineriartortitsisoqaannarnani atuartunut ikorfartuutaasinnaasunik ineriartortitsisoqarpoq, tamannalu pingaarutilerujussuuvoq, misiligutimmi imminerminni ikiorsiinavianngimmata iliuusissalli ikiorsiisuussallutik, Katti Frederiksen ilisimatitsivoq.