soraarummeerneq

Naqinnernik ilisarinnissinnaanngitsoq misilitsilluarpoq

KTI-mi ilinniartitsisup iPad iluaqutigalugu naqinnernik ilisarinnissinnaanngitsut soraarummeersinnaanerat aqqutissiorpaa

Krister Støvlbæk iPadilersorpoq ilinniaqataalu misilitsissutissanik naqitanngorlugit agguaassiffigineqarlutik

Teknikkimi ilinniarfimmi KTI-mi ilinniartut tamassa soraarummeeqattaarput. Ukiormannalu soraarummeernermut ilinniartitsisoq Vittus Karlsen iPad atorlugu atuarniarnermik ajornartorsiutillit soraarummeersinnaanissaat aqqutissiorsimavaa.

Krister Støvlbæk Sisimiuneersoq sanasutut soraarummeernermi atuagassornermi iPad iluaqutigalugu misilitsinnissamut periarfissinneqarpoq. Soraarummeerutissaq iPadip atuffassissutaanit atuarneqarpoq suliassartaalu video atorlugu paasinarsarneqarsimalluni.

Ineriartortitassaavoq
- Ilinniarniartut atuarniarnikkut ikiortariaasut ilaatigut inimi allamik atuffassisulerlugit misilitsittarsimavagut. Inimili allami misilitsittariaqalerneq ilinniartut innarluutilittut misigilersittarpai. Taamaammat iPad atorlugu soraarummeerutit suliarisimavakka taamlu Krister Støvlbæk siutequserluni akornusersuinani soraarummeerutinik paasisaqarsinnaalersimavoq maannamullu atuagassorluni misilitsinnerit pingasut angusiffigereerlugit, Vittus Karlsen Sermitsiaq.AG-mut oqarpoq.

Maanna ilinniartut assarsorlutik misilitsinneri ingerlapput assassornermilu naammassisut Nuummi Sisimiunilu junip 18-at ilinniarsimanermut uppernarsaatinik agguaassiffigineqassapput.

- iPad iluaqutsiullugu misilitsinneq nutaajuvoq inerisartuagassaallunilu. Siullerpaamik maanna misilipparput tamannalu iluatsilluartutut nalilerlugu, Vittus Karlsen oqarpoq.

Powered by Labrador CMS