napparsimaveqarfik

Napparsimaveqarfik anaanaasumit isornartorsiorneqareernermi kingorna utoqqatsertoq

Nukappiaqqap ukiukitsup talia napisimasup sullinneqarnera pitsaasimanngitsoq napparsimaveqarfik ajuusaarluni nalunaaruteqarpoq. Sisimiunit Nuummukaanneqarnissaanut piffissami sivisuallaartumi utaqqisinneqarsimasut nassuerutigineqarpoq

Miilu Lundblad Olsen sisamanik ukioqarpoq - talia saamerleq poorskikkunni napivoq

Anaanaasup napparsimaveqarfik isornartorsiorpaa sapaatip akunnerata siuliani, tamanna Sermitsiaq.AG-mit aamma allaaserineqarpoq.

Anaanaasup meeraatalu talia napisisimasup naapertuuttumik pineqarsimannginnerat peqqinnissaqarfimmit nassuerutigineqarpoq. Timmisartumik angallanneqarlutik Nuummi suliarineqarnissaanut Sisimiuni pisariaqanngitsumik sivisuumik utaqqisinneqarmasut aamma napparsimaveqarfimmit nalunaaruteqartoqarpoq.

Miilu Lundblad Olsenip talini saamerleq poorskimi apriilip tallimaani napivaa aatsaalli apriilip arfineq pingajuani anaananilu Nuummukaanneqarlutik.

- Timmisartup ilaaffissaraluata siulliup timminissaralua taamaatiinnarneqarpoq tullianullu ajoraluartumik inissarsineqaratik. Taamaasillutik sivisuallaamik utaqqisinneqarnerat uagut akisussaaffigaarput ajuusaarpugullu, taama oqarpoq Aqutsisoqarfiup ataani peqqinnissaqarfiup qullersaqarfiani pisortaq Jóanis Erik Køtlum Sermitsiaq.AG-mut oqarpoq.

Suleriaaseq naapertuutinngitsoq
Napparsimasut sinerissami peqqinnissaqarfiup qitiusumik immikkoortuiniit suluusalinnut qulimiguulinnulluunniit ilaallutik Dronning Ingridip Napparsimmavissuanut angallassassat, periarfissat pingasut atorlugit nakorsaanernit naliliivigineqartarput:

'Pinasuagassat', suluusalimmik qulimiguulimmilluunniit attartornikkut ingerlanneqartartut. 'Aqqut siulleq', nalinginnaasumik angallannermi aqqummut siullermut ilaatinneqartartut, kiisalu napparsimasut ilaat ima ajunngitigisarput nalinginnaasumik angalasutut ilaatinneqartarlutik.

- Pisumi matumani nakorsap naliliinera naapertorlugu meeraq sisamanik ukiulik - taama ajoqusertoqartillugu periusaasartutut 'aqqut siulleq' atorlugu angallassassanngortinneqarpoq. Taama angallassisarneq napparsimasunut inuunerminnik- piginnaasanilluunniit annaasaqarnissamut navianartorsiunngitsunut piaakannersumilli/pilertortumik takuneqartussanut atorneqartarpoq.

Iliuusissanik misissuisoqarpoq
Anaanaasup ernini ernumagisimagaa paasisinnaallugu Jóanis Erik Køtlumip oqaatigaa.

- Pisimasumi nassuiaatigineqartumi matumani ajuusaarnartoq tassaavoq angalanissap siulliup Air Greenlandimit taamaatinneqarnera. Air Greenlandimilu periuseq naapertorlugu ilaasussat utaqqisut timmisartup tullissaanut salliunneqarneq ajorput. Timmisartumut tulliuttumut bilitsisereersimasut inissat pigiinnartarpaat, inissallu tamarmik inuttassaqareermata anaanaq meerarlu ilaanngitsoorput.

Qaqutigut taama pisoqartillugu peqqinnissaqarfik periarfissat allat atorlugit suliniassaaq. Napparsimasunik kinguaattoortoqartillugu najukkami napparsimmavimmi nakorsat Dronning Ingridillu Napparsimmavissuani nakorsat imminnut attaveqatigiittuartarput. Matumani angallanneqarnissamut aalajangikkap siulliup napparsimasup pisariaqartitaanut suli naapertuutuunera imal. allanngortittariaqarnera isummerfigineqassaaq.

- Pisumi matumani peqqinnissaqarfimmit periaasaasoq naapertorlugu 'aqqut siulleq' atorlugu angallanneqarnissap naapertuutinnginnera meeqqamut arnaanullu ajuusaarnartumik sivisuallaamik utaqqisitaanermik kinguneqarpoq. Siunissami taama pisoqaqqinnginnissaa anguniarlugu iliuuseqarnissaq peqqinnissaqarfimmit suliniutigineqarpoq, Jóanis Erik Køtlum oqarpoq.

Powered by Labrador CMS