Skip to main content

Napparsimasut oqaaseqartartuannik pilersitsoqarnissaanik piumasaqaat pillugu atsiornerit tunniunneqartut

Kalaallit Nunaanni napparsimasut oqaaseqartartuannik pilersitsisoqarnissaa anguniarlugu atsiornerit katersorneqarsimasut Peqqissutsimut Naalakkersuisumut Anna Wangenheimimut tunniunneqarput. Inuit katillugit 1.609-t atsiorsimapput.

Kalaallit Nunaanni napparsimasut oqaaseqartartoqarnissaminnik pisariaqartitsipput, oqaaseqartartup napparsimasup napparsimanermini katsorsartinnerminilu pitsaanerusumik atugaqarnissaa sulissutigissavaa.

Oqariartuut tamanna nuna tamakkerlugu politikkeriusimasup ilungersuussilluartartullu, toqukkut qimagutereersup Suka K. Frederiksenip ukiorpassuarni periarfissat atorlugit kissaatigisarsimavaa.

Atsiornerit napparsimasut oqaaseqartartoqarnissaannik piumasaqaatitallit katersorneqarsimasut Sukap paniata Katti Frederiksenip Peqqissutsimut Naalakkersuisumut maanna tunniussimavai.

- Atsiornerit Naalakkersuisumut tunniukkatsigit, napparsimasut oqaaseqartartoqarnissamik pisariaqartitsinerannik anaanama oqariartuutigisartagaa uteqqillugu oqaatigaarput. Anaanam suliarisimasaa maanna politikkeriniilerpoq, taakku suliassap naammassineqarnissaa isumagisussanngorpaat, Katti Frederiksen oqarpoq.

Katti Frederiksenip ataatani qatanngutinilu peqatigalugit atsiornerit 1.609-iusut Peqqissutsimut Naalakkersuisumut Anna Wangenheimimut tunniuppai.

Sukap ilungersuutigisimasaa

Naalakkersuisuusimasup ilungersuussilluartartullu Suka K. Frederiksenip napparsimasut oqaaseqartartoqarnissamik pisariaqartitsinerat ukkatarisimavaa, atsiornernillu katersinermik aallartitsisimalluni.

- Qitiutinneqartoq tassaavoq, napparsimasup peqqissinissaminut nukiminik atuinissaa. Napparsimasup napparsimanerminut tunngatillugu pitsaasumik tamakkiisumillu kiffartuunneqarnissaq anguniarlugu nukini atussanngilai, Katti Frederiksen oqarpoq.

- Ajoraluartumik ataqatigiissaarisoqartannginneratigut peqqinnissaqarfiup napparsimasullu akornanni oqaloqatigiittarneq pitsaasuusanngilaq. Tamannalu tassaavoq napparsimasut oqaaseqartartuata pitsaanerulersinniarlugu sulissutigisassaa, Katti Frederiksen oqarpoq.

- Pitsaanerusumik sukkanerusumillu kiffartuussineq aamma pitsaanerusumik ataqatigiissaarisarneq oqalqatigiittarnerlu inuunermik annaassisinnaavoq. Suliassaq tamanna politikkerit maanna ingerlateqqissinnaanngorpaat, Katti Frederiksen oqarpoq. 

Suliassaq politikkeriniilersoq

Suka K. Frederiksen sivisuumik napparsimareerluni 2020-mi juulip 21-ani toqukkut qimaguppoq. Toqussani sioqqullugu atsiornerit katersorneqarsimasut tunniunniarlugi naalakkersuisumt isumaqatigiissuteqarfigisimavaa.

- Nalunngilara Suka napparsimasut pitsaasumik atugaqarnissaat annertuumik sulissuteqarfigisimagaa, anguniagaq tamanna ataatsimoorussaraarput. Taamaattumik nuannaarutigaara ilaqutaasut aamma Ilaqutariinnermut Peqqissutsimullu Ataatsimiititaliaq tunniussinermi peqataasinnaammata, Peqqissutsimut Naalakkersuisoq Anna Wangenheim atsiornerit tunniunneqarnerannut atatillugu tusagassiorfinnut nalunaaruteqarnermi oqarpoq.

Tamatuma saniatigut Ilaqutariinnermut Peqqissutsimullu Ataatsimiititaliaq sinnerlugu Mikivsuk Thomassen peqataavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER