kræfti

Napparsimasut angerlarsimaffiannit ataataasoq anisitaasoq

Ukiortaamiit napparsimasut Københavnimut katsorsartikkiartortartut tamarmik Napparimasut Angerlarsimaffianni ineqaammi ataatsimi qanigisatik najugaqatilersinnaalissavaat. Tamaattorli aatsaat inissaqarpat, tamannalu qaqutigoortuusartoq qanigisaasut ilaat oqaluttuarpoq

Ukiortaamiit nappasimasut Københavnimi katsorsarneqartussat qanigisaat napparsimasup inaani kalaallit Napparsimasut Angerlarsimaffianni akeqanngitsumik unnuisinnaalerput. Tamanna Inatsisartut ukiarmi aalajangerpaat.

Kisianni angalaqateqarnissamik aaqqiineq ukiumut 2 milioner koruuninit sinneqartussaq napparsimasut qanigisaasullu arlallit Napparsimasut Angelarsimaffianni inissaaleqinerujussuarmik maannakkut misigisaqartut ernumassutigaat.

Pania unitsinneqarpat angutaa nuussaaq
Henriette Berthelsen Danmarkimi peqqissaasuusoq napparsimasorpaalunnik Rigshospitaletimi aamma Napparsimasut Angerlarsimaffianni attaveqangaatsiartarpoq.

Atuaruk: Akuersissut: Peqqissartut illuanni akeqanngitsumik ineqateqarsinnaaneq nerisaqarsinnaanerlu

Napparsimasut sinnerlugit Napparsimasut Angerlarsimaffiannut sianerpoq aaqqiinerlu pillugu apeqquteqarluni; kræftimik nappaatillip inuusunnerusup angunni januaarimiit, soorlu aaqqiinermi siunertarineqartoq, Napparsimasut Angerlarsimaffianni najortigisinnaaneraa apeqqutigaa.

– Pania Napparsimasut Angerlarsimafianniippat angutaa tassani aamma najugaqarsinnaasoq ilisimatinneqarpunga. Maannakkut inuusuttoq taanna unippat angutaa nuuttariaqassaaq.

- Angutaata Danmarkiliartarnini, tappavanilu najugaqartani ukiup affaata missaani nammineerluni aningaasalersorsimavaa. Tamanna ilaqutariinnut 60.000 koruunik akeqarsimavoq aamma aningaasatigut artornaannarani misigissutsikkut aamma tatisineruvoq, Henriette Bertelsen oqarpoq.

Angutaa utoqqalinersiaqarpoq aningaasarpassuaateqaranilu.

– Tamanna kusanaatsuliornertut isumaqarfigaara. Napparsimasunik ulikkaarpat angalaqataasut anisitaassapput. Taavami piviuusmik pitsanngorsaasoqassanngilaq, Henriette Berthelsen oqarpoq.

Suliaq pillugu Sermitsiami atuaqqigit:

Powered by Labrador CMS