Napparsimasunut qanigisaasut peqqissartut illuanni unnuisinnaanngillat
Københavnimi Kalaallit Peqqissartut Illuanni napparsimasunut qanigisaasut unnuisinnaassanngillat juunip 15-anit septembarip 15-at ilanngullugu
Napparsimasut Danmarkimi katsorsartinnerminnut atatillugu sapinngisamik pitsaanerpaamik atugassaqartinniarlugit Kalaallit Peqqissartut Illuanni inissaqarniarneq pissutigalugu napparsimasut inissaqartinnissaat salliutinneqarpoq.
Angajoqqaajusut periarfissaqarput
Qanigisaasut juunip 15-anit septembarip 15-ata tungaanut Københavnimi Kalaallit Peqqissartut Illuanni unnuisinnaassanngillat, Namminersorlutik Oqartussat tusagassiutinut nalunaarummi allapput.
- Qanigisaasut 13. juni 2019 sioqqullugu piffissami tassani napparsimasoq ingiaqatiginiarlugu bilitsisimasut Kalaallit Peqqissartut Illuanni unnuinissamut suli periarfissaqassapput, ilisimatitsissutigineqarpoq.
Misissuisoqarsimagaluartoq
Qanigisaasut allani unnuinissaannut periarfissat Peqqinnissaqarfiup Qullersaqarfianit misissorneqaraluarput, tunngavissarisalli iluanni aaqqiissutissamik nassaartoqarsinnaanani.
- Ingiallortit peqqinnissaqarfimmit inissarsiuunneqartut, taakku tassaasinnaallutik meeqqamut angajoqqaat, peqqissartut illuanni suli inissaqartinneqassapput.