isumannaatsuuneq
Napparsimasunut isumannaatsuuneq pillugu suliaq eqqartuussiviit qullersaannut ingerlatinneqartoq
Nunatta Eqqartuussiviani suliaq eqqartuussissutigineqartoq Danmarkimi eqqartuussiviit qullersaannut napparsimasup ingerlatitseqqinnissaanik suliami maalaarutinik aalajangiisartut akuersissuteqarfigaat
Maalaarutinik sulianik aalajangiisartut januaarip 22-ani napparsimasup suliassanngortitaata Danmarkimi eqqartuussiviit qullersaanni aalajangiiffigisassanngortinneqarnera akuersissutigaat, taanna Nunatsinni Eqqartuussivimmi suliakkiissuminit taperserneqarsimanngilaq.
Domstol.dk taama ilisimatitsivoq.
Akuersineq
Suliaq malittarisassat nassuiarneqarnerannut inatsisartut peqqussutaanni paasititsilluni akuersititsinermut tunngasumi napparasimasut inatsisitigut inissisimanerannut tunngasuuvoq.
Iviangimigut kræfteqarluni nakorsiartoq eqqartuussiviliarsimavoq, iviangimigut suliaritinnissaminik akuersinnginnermini peqqinnissaqarfimmit pitsaanerusumik paasissutissinneqartussaasimagaluarluni isumaqarami.
Paasissutissaq pitsaanerusoq
Taanna isumaqarpoq, peqqinnissaqarfiup Danmarkimi iviangik tamaat piinngikkaluarlugu suliaritinnissamik neqerooruteqartoqartarnera paasissutissiissutigisariaqarsimagaluaraa.
Tamanna periarfissaq Kalaallit Nunaanni neqeroorutigineqarneq ajorpoq - aammalu peqqinnissaqarfimmi sulisut taamatut Danmarkimi suliaritinnissamik innersuussisinnaanngillat.
Pisussaaffiunngitsoq
Nakorsaq, napparsimmavik aamma Peqqissutsimut Naalakkersuisoqarfiup erseqqissaatigereerpaat, Inatsisartut peqqussutaat malillugu Kalaallit Nunaanni suliarinninnerit pineq ajortut paasissutissiissutigineqartassanngillat, imaluunniit peqqinnissaqarfik nunani allani suliaritinnissanut innersuussineq ajortoq.
Suliaq siullermik Nunatsinni Eqqartuussivinni suliarineqarpoq, kingornalu Nunatta eqqartuussisuuneqarfianut ingerlateqqinneqarluni, taakku tamarmik napparsimasoq tapersinngilaat. Eqqartuussisuuneqarfimmi suliaq 2014-imi decembarimi aalajangiiffigineqarpoq.
Taperserneqanngitsoq
Eqqartuussiviit taakku marluk Kalaallit Nunaanni suliarinnissinnaanerit qaangerlugit paasissutissiinissamik pisussaaffeqarnissamut tunngavissaqarsorinngilaat - imaluunniit nunani allani suliaritinnissamut napparsimasup peqqinnissaqarfimmit innersuussiffigineqarnera.