Nappaatit tunillaassortut pillugit inatsit Inatsisartutigut nakkutigineqalernissaa siunnersuutigineqarpoq
Nappaammik tunillaassuuttoqartillugu Naalakkersuisut katersuunnernut killilersuisalersinnaanissaannut siunnersuuteqartoqarpoq.
Coronavirusimik tuniluuttoqarnerani nappaatit tunillaassortut akiorniarlugit iliuutsit pillugit Inatsisartut inatsisaat pingaarutilerujussuusoq takutippaa.
Inatsit Inatsisartuni allanngortinneqarpoq upernaaq. Inatsisartut ataatsimoorlutik piumasarisimavaat, inatsimmik atorunnaarsitsinissamik aalajangersaasoqassasoq, tassani Naalakkersuisut nappaatit tunillaassortut akiorniarlugit inatsimmi nutaami killilersuutigitinniagaannik peqqusutiginiagaanngillu Inatsisartut nakkutiginninnissamut periarfissinneqanngimmata. Folketingimi assingusumik inatsisiliortoqarpoq coronartoqareersoq. Danmarkimi inatsisaavoq danskit naalakkersuisuis suliniutaat Folketingimi ataatsimiitialiamit akuerineqaqqaartassasoq.
Inatsisartut piumasaqaataat qanoq eqquutsinneqarsinnaanersut Naalakkersuisut maanna siunnersuuteqarput. Nappaatit tunillaassortut akiorniarlugit iliuutsit pillugit Inatsisartut inatsisaata missingiut tusarniutigineqarpoq.
Killilersuinerit inerteqquteqarnerillu
Naalakkersuisut killilersuinissamut siunnersuutaat Inatsisartuni ataatsimiititaliap akerlilerpagu, siunnersuut atuussinnaassanngitsoq siunnersuutigineqarpoq.
Inatsisartuni ataatsimiititaliaq Naalakkersuisunit ima tusaaniarneqartassasoq siunnersuutigineqarpoq:
Nappaatit nuiaqatigiinnut suut aarlerinartorsiortitsinersut
- Naalakkersuisut Tunillaassortunik Nappaalanersuaqarneranut Ataatsimiititaliarsuaq siunnersueqatigereerlugu pisortat namminersortullu ulloq unnuarlu paaqqinnittarfiinik, atuarfinnik ilinniarfeqarfinnillu allanik atuinermut taakkununngaluunniit isersinnaanermut killilersuinermut inerteqquteqarnermulluunniit, nuna tamakkerlugu nunalluunniit ilaanut piffissami aalajangersimasumi malittarisassanik aalajangersaasinnaapput.
- Inuit arlallit ataatsikkut piffimmi tassani katersuussinnaanerannut inerteqquteqartitsineq
- Aalajangersagaq naapertorlugu ininut, inuussutissarsiummik ingerlataqartut oqartussaaffigisaannut aamma tamanit iserfigineqarsinnaasunut tamat iserfigisinnaasaannut malittarisassiortoqarsinnaassaaq.
- Aalajangersagaq naapertorlugu ininut, inuit inatsisitigullu pisinnaatitaasut pisussaatitaasullu oqartussaaffigisaannut aamma tamanit iserfigineqarsinnaasunut isernissamik imaluunniit taakkuninnga atuinissamik inerteqquteqarnermut imaluunniit isernissamik killilersuinermut malittarisassiortoqarsinnaassaaq.
Siunnersuut novembarip qulingililuaata tungaanut tusarniutigineqassaaq.