Nappaatipalaaq qaqutigoortuugaluartoq Sisimiuni tuniluuttoq
Kinguaassiuutitigut trichomonasimik nappaatipalaaqalersimasut amerliartorneri Sisimiuni qitiusumik peqqissaavimmit ernumagineqarpoq. Peqqissaaviup innuttaasut kaammattorpai atoqatigiinnermi usuup puuanik atuisaqqullugit, erseqqissaatigalugulu tunillatsissimasut paasineqartut nunatsinni tamaneersuusartut.
Sisimiuni peqqinnissaqarfimmi kinguaassiuutitigut nappaatipalaanik misissuisarfimmi qaqutigoornerusumik nappaatipalaaqartunik aasarli naammattoorsisalersimapput. Nappaatipalaaq pineqartoq miluuffigisaminut ilanngartuisuuvoq (parasit, aaqq.) Trichomonasimik taaneqartartoq.
Nittartakkami sundhed.dk-mi trichomonasimik aseruuttoorneq Danmarkimi "qaqutigoorluinnalersimasutut" taaneqarpoq.
Trichomonas usuupooqarani atoqatigiinnermi tunillaasartoq, peqqissaasutut ikiorti Natacha Davidsen, Sisimiuni kinguaassiuutitigut nappaatipalaanut misissuisarfimmi atorfeqartoq, oqaluttuarpoq.
- Oqarsinnaavunga gonorremik aamma klamydiamik tunillatsissimasut amerlaqatipajaavannik trichomonasimik tunillatsissimasunik nassaartalerpugut, Natacha Davidsen oqarpoq nangillunilu:
- Trichomonas parasitiuvoq (miluuffigisaminut ilanngartuisartoq, aaqq.) timimi ameraasap iluanut miluuttartoq, soorlu arnap iluani ameraasanut. Svampernermut assigusumik ilisarnaateqarluni sunniuttarpoq, soorlu anniarnerit, iluaalliornerit aamma quinermi qasilisoortitsinerit atoqatigiinnermilu anniarneq. Angutini ersiuteqarneq ajorpoq, angutillu taamaasillutik nalusaminnik tunillaassuisarlutik, oqarpoq.
Ernumanartoqarpoq
Sisimiuni qitiusumik peqqissaaviup erseqqissarpaa nappaatipalaanik, soorlu trichomonasimik, syfilisimik, klamydiamik aamma gonorremik tunillaasimasut Kalaallit Nunaanni tamarminngaanneertartut. Peqqissaasutut ikiorti akulikitsumik sianerfigitittarput nunatta ilaaniit ilisimatinneqarlunilu illoqarfimmi allami tunillatsissimasoq Sisimiuni attaveqartuusimasartoq, tunillassimasinnaasaalu Sisimiuniittoq.
- Tamanna ernumanarpoq. Assersuutigalugu arnat naartusut nappaatipalaamik tunillatsissimasut erniaartoorsinnaasarput, peqqissaasoq oqaluttuarpoq, ilisimatitsillunilu nappaatipalaat pillugit paasititsiniaaneq ingerlanneqartuartoq.
Gonorrertut klamydiartullu allannguuteqanngillat
Sisimiuni qitiusumik peqqissaavik Facebookimini ilisimatitsivoq gonorrertut aamma klamydiartut siornamut sanilliullugit allannguuteqaratik suli taama amerlatigisut.
2021-mi qaammatit marluk siulliit Sisimiuni gonorremik nappaatipalaaqartut 38-it aamma klamydiamik nappaatipalaaqartut 55-it nassaarineqarsimapput.
- Ilanngullugu ernumanarluinnarpoq ukiukitsut nappaatipalaaqartut amerlangaatsiartut naammattoortaleratsigit, Natacha Davidsen nassuiaavoq.
Ukioq 2020mi gonorremik tunillatsissimasut Sisimiuni paasineqartut 272-iupput, klamydiamillu nappaatipalaaqartut 338-it Sisimiuni paasineqarsimallutik.
- Atoqatigiinnermi usuupooqartarnissaq kaammattuutigeqqissavarput. Immitsinnut paarinerusariaqarpugut, ilagullu paarinerusariaqarlugit. Kinguaassiuutitigut nappaatipalaaqareersimallutik tunillatseqqissimallutik uteqqiattut maanna amerlavallaarujussuarput. Tamanna allanngortittariaqarpoq, Natacha Davidsen, Sisimiuni peqqissaasoq Sermitsiaq.AG-mut oqarpoq.