Napasoq
Napasumi eqqakkat qaleriiaatiinnaleqqasut
Napasumi eqqakkat ima amerlatigipput sumi tamaaniinnarmiilersimallutik allaallu illutulli portutigilersimallutik
Nunaqarfinni eqqakkat qinikkanit ukiuni arlaqalersuni isiginngitsuusaarneqarsimapput.
Nunaqarfiit tamatumani eqqugaasut ilaat tassaavoq Napasoq, Maniitsup kujataaniittoq.
Napasoq ullumikkut 150-it missaannik inoqarpoq, eqqakkallu ukiut ingerlaneranni amerliartuinnavissimallutik. Eqqaavissuaq maanna nunaqarfiup avataa angullugit siammarsimalersimavoq, qaleriissallu illunit portunerulersimallutik.
- Nunaqarfimmut umiatsiamik tikikkiartorluni nunaqarfimmi alianaakkaluaqisumi taama eqqagaqartiginera uggornartaqaaq, najugaqartut ilaat Paornánguak Jessen oqarpoq.
- Qerititsivikut, nillataartitsivikut, errorsivikut, aalisakkeriviusimasup saviminertakui, illup iluani atortukut, pappilissat, nerisakut, ila suut tamaasa eqqaavimmut tassunga eqqarneqartarput, oqaluttuarpoq.
Paornánguak Jessenip qularutiginngilaa, qerititsivikut nillataartitsivikullu kemikalianik akoqaqisut innuttaasunut pinngitsooratik ulorianarluinnartuusimassasut, Arnat marluk tamatuma eqqaani illullit kræftimik toqquteqarlutik ungasinngitsukkut aamma peerussimapput, tamannalu innuttaasut akornanni ernumalersitsivoq.
Qeqqata Kommuniata eqqakkanik ajornartorsiuteqarnermik qanoq iliuuseqarfiginninnera Sermitsiami normu 34-mi matumani elektroniskimik atuarsinnaasanni annertunerusumik atuaruk: