Napaattuup siunnersuutaa Ittoqqortoormiinut akornutaasinnaasoq

Ittoqqortoormiit eqqaani qilalukkat qernertat ikiliartortut misissuinerit takutippaat, killilersugaanngitsumillu piniarneq eqqunneqassappat peqassutsimut innarleerujussuassaaq

Inatsisartunut ilaasortaq Jens Napaattooq, Partii Naleraq, Ittoqqortoormiini aamma Qaanaami killilersugaanngitsumik qilagarniarneq ammaanneqassasoq Naalakkersuisunut piumasaqarpoq. Pinngortitaleriffimmiilli Ittoqqortoormiit eqqaani 2016-imi 2017-imilu qilalugaqassutsimik misissuisoqarmat, 2008-imi misissuinermut naleqqiullugu qilalukkat malunnaatilimmik ikilisimasut paasineqarpoq, Sermitsiaq allappoq.

Tamannalu silaannaap pissusaata allanngorneranik, qilalukkallu amerlassusaannut naleqqiullugu pisarineqartartut amerlavallaarnerannik pissuteqartoq, ilisimatusartoq Fernando Ugarte, Pinngortitaleriffimmmi Miluumasunut Timmissanullu Immikkoortortaqarfimmi immikkoortortami pisortaq, oqarpoq. Killilersugaanngitsumik qilalugarniarneq ammaanneqassappat, imaluunniit pisassat amerlineqassappata, tamanna peqassutsimik innarleerujussuarsinnaasoq, taanna naqissusiivoq.

Qaanaap eqqaani qilalugaqarluartoq
- Atlantikup avannaani miluumasut pillugit ataatsimiititaliap NAMMCO-p Ilisimatusarnermut ataatsimiititaliaata qilalukkanik pisassiissutit apparneqarnissaat innersuussutigikuaa. Maannakkutuulli pisarineqartartut amerlatigiinnassappata, qilalukkat piffissami qanittumi ikippallaalissapput, Fernando Ugarte oqarpoq.

Ittoqqortoormiit eqqaani qilalugaqassuseq annertunerusumik paasisaqarfiginiarlugu aggustip ingerlanerani Pinngortitaleriffimmi biologit, Ittoqqortoormiit eqqaani qilalukkanik qaammataasakkut nassitsissusersuipput.

Pinngortitaleriffik 2007-mi Qaanaap eqqaani qilalugaqassutsimik misissuisitsimmat, taavani qilalugaqarluartoq paasineqarpoq. Maannakkullu pisassiissutaasartut siunissami taaamak amerlatigiinnassappata, tamanna peqassutsimut innaarliinissaa ilimagineqanngitsoq, Fernando Ugarte oqarpoq.

Allaaserineqartoq aviisimi Sermitsiami atuarneqarsinnaavoq. Aviisi uani pisiariuk:

Powered by Labrador CMS