Napaattooq: Ingerlalluarpugut
Nuna tamakkerlugu oqallisaaneq assut sakkortuvoq, taamatorluinnarlu pisoqarpoq Jens Napaattuup ilaquttani ilanngullugit internetikkut inuit oqaloqatigiittarfianni tamanut qaammatit marlussuit matuma siornatigut saqqummiummagit. Tamannali pisariaqarsimavoq, oqarpoq.
- Ajornartorsiuteqarneq nassuerutigalugu iluaqutaavoq, Jens Napaattooq, Inatsisartuni aamma Avannaata Kommuniani kommunalbestyrelsemi ilaasortaq aviisimut AG-mut oqarpoq.
Naleqqami ilaasortap Kalaallit Nunaanni weekendip ingerlanerinnaani tikkuartorneqarnerpaanngornera kia eqqaamanngilaa, ernini live-rtuliullugu aappanilu aalakoorlutik assortuunnertik tamanut takutimmagu. Aappaata asseq Facebookimut kinguninnguatigut ikkuppaa, kiinaa aagasattoq assimi takuneqarsinnaavoq. Nuliamut annersaasoqarneranik, meeqqamik sumiginnaasoqarneranik, imigassamik ajornartorsiuteqartoqarneranik allarpassuarnillu internetikkut pisuutitsinernik kinguneqartumik.
- Ilumoortoq nalullugu tikkuartuinissaq ajornanngittaqaaq. Uanilu inuit arlallit taamaaliorput, filmiliaq takunikuunngikkaluarluguluunnit, Napaattooq oqarpoq, nangipporlu:
- Aappannut oqaatsit atukkakka soorunami sakkortuallaarput, siorasaarinertut nalilerneqarsinnaapput. Aamma ernera live-rtikkakku pitsaasuunngilaq. Kisianni aappara attunngilara, tassa ilumoortoq. Qullermik anaariaraluarpaanga kimillatsiternerminik kinguneqartumik – kiinaa aagasammat sakkortorpasippoq – namminerlu natermut nakkarpoq.
Aappariit filmiliaq kingornatigut peerpaat.
- Kisianni peqqissiminikuunngilanga. Ilaqutariittut tusaaneqassagutta inuunerpullu ingerlateqqissagutsigu taamaaliornissaq pisariaqarsimammat, oqarpoq.
Allaaserisaq tamaat uani atuaruk: