Napaattooq: Aningaasanut inatsit pillugu ingerlatsineq ajorluinnarpoq

Partii Naleqqamit Aningaaaqarnermut Ataatsimiititaliami ilaasortaq Jens Napaattooq aappaagumut aningaasanut inatsisissap suliarineqarnerani ingerlatsinermut tamarmiusumut tupigusunnera annikigisassaanngilaq.

- Ilisimatinneqarpugut aningaasanut inatsisissaq pillugu isumaqatiginninniaqqinnissamut aggersarneqassalluta, aggersarneqarsimanngilagulli, taanna Sermitsiaq.AG-mut oqarpoq.

Jens Napaattuup tupigusunnera minnerulinngilaq, aningaasanut inatsisissap kingusinnerpaamik tallimanngorpat akuerineqareertussap suliarineqarnera sivitsorneqarmat. Oqaluttuareriikkatsitut, inatsisissatut siunnersuut akuersissuteqarnissap ullunik arfinilinnik kinguartitsisinnaasoq Inatsisartut aqangu suliaripallassavaat.

- Aningaasanut inatsitsissaq pillugu Naalakkersuisut ataasiaannarluta ataatsimeeqatigaavut, ataatsimiinnermilu isumaqatiginninniartoqanngilaq, piumaffigineqaannarpugut kissaatitsinnik saqqummiussissasugut. Torersumik isumaqatiginninniartoqarnissaa ujartorpara, pingaarnerutitat pillugit isumaqatigiissuteqarsinnaanerluta takuniarlugu.

- Illersorneqarsinnaanngitsoq

Naalakkersuit Partii Naleqqallu akornanni isumaqatiginninniarnerit - imaluunniit isumaqatiginninniartoqannginnera - kisiisa isornartorsiunngilai. Aamma Aningaasaqarnermut Ataatsimiititaliami sulinermut atatillugu isumaqarpoq, paasissutissanik pisariqartinneqartunik pissarsitinneqarsimannginneq sulianillu tuaviinnamik sulitinneqartarneq isornartorsiorpai.

- Aningaasanut inatsisissaq pillugu ingerlatsineq ajorluinnnarpoq. Politikkimik suliaqaleramali taamatut ingerlatsisumik takunikuunngisaannarpunga. Uanga isumanga malillugu, nunap aningaasassai pillugit tuaviinnavissuaq sulisinneqarnerput illersornneqarsinnaanngilluinnarpoq.

Tamanna aamma pissutigalugu, Partii Naleraq aningaasanut inatsisissamut tunngatillugu isumaqatigiissuteqarsinnaanersoq eqqarsaatigalugu isumalluarpallaanngilaq.

- Aningaasaqarnermut Ataatsimiititaliami suliarisartakkavut qiviaraanni, assigiinngitsorpassuit Siumut-gruppiannik isumaqatigiissutigisinnaasarpavut. Naalakkersuisunulli tunngatillugu isumalluarpallaanngilanga. Siumut-gruppiata isumaqatiginerorpasikkaatigut, Demokraatit Naalakkesuisut isumaqatiginerorpasippaat. Tamanna assut eqqumiippoq.