NAPA-p pisortani inuulluaqqusariaqaleraa

Nunani Avannarlerni Piorsarsimassutsikkut Attaveqaat, NAPA, nutaamik pisortassarsiortussanngorpoq. Pisortaasormi Anne Mette Gangsøy 31. juli 2022 soraarniuteqarpoq.

Anne Mette Gangsøy NAPA-mi ukiuni marlunni kingullerni pisortaareerpoq, ilaquttanili maqaasigamigit maanna soraarniuteqartoq, NAPA tusagassiorfinnut nalunaaruteqarluni allappoq.

- Anne Mette Gangsøy tunniussimalluartutut aamma sullarissutut nunani avannarlerni peqataalersitsisunngortitsinissaq aamma piujuartitsinissaq anguniarlugit kulturip atuuffianik pingaartitsisutut suliaqartoq nalunngilara. Suliatigut piginnaasai aamma inuiaqatigiitsinnik piujuartitsilluni ineriartortitsinermi eqqumiitsuliornerup pingaaruteqarnera pillugu erseqqissumik oqaaseqartarnera assut qujamasuutigisimavakka. Paula Lehtomäki tusagassiorfinnut nalunaarummi oqarpoq.

Paula Lehtmäki Nunani Avannarlerni Ministerit Siunnersuisoqatigiivisa generalsekretæriuvoq.

Inuusuttut ilinniagaqartut sullikkusukkai

Anne Mette Gangsøy Norgemeersuuvoq NAPA-milu ukiuni marlunni kingullerni sulisimalluni. Sulinermini nunatsinni kulturi aamma inuiaqatigiit ilinniarfigilluarsimavai. Suleqatimilu tigulluarsimammanni nuannaarutigalugu oqaluttuarpoq:

- Tamarmik ilisimasaminnik misilittakkaminnillu avitseqateqarluarusuttarsimapput, uagullu issittormiut isiginnittariaasiannik Nunani Avannarlerni tamani paasineqarnissaat akuerineqarnissaallu pillugit avitseqateqarnissatsinnut periarfississimalluta. Kalaallit Nunaat assut nuannaraara, NAPA-milu suliffiga nuannaralugu, kisianni ilaquttakka maqaasivakka. Siunissaq qanoq nassataqarumaarnersoq naluara, kisianni neriuppunga meeqqat inuusuttullu ilinniagaqarnerat suliaqarfigissallugu, Anne Mette Gangsøy oqarpoq.

Pisortatut tullersorti, Nina Paninnguaq Skydsbjerg Kristiansen 1. juli 2022 aallarnerfigalugu pisortanngorallassaaq, pisortassamik pissarsisoqarnissaata tungaanut.

NAPA-p eqqumiitsuliornermut kulturilerinermullu kalaallinut attuumassuteqartumik suliassaraa eqqumiitsuliortut, kulturilerisut aamma innuttaasut tapersersortarnissaat ilaatigut kulturimut tapiisarfikkut, kiisalu Issittormiut piujuartitsisumik ineriartortinneqarnerannik tapersersuinissaq , Issittumi suleqatigiinnermut tapiissuteqartarfikkut.