NAPA-p pisortaa Norgemiu: Ataataga maani kulturimi takusarpara

Anne Mette Gangsøy Nunani Avannarlerni Piorsarsimassutsikkut Attaveqaammi NAPA-mi ukioq ataaseq missiliorlugu pisortaasimavoq. Kalaallit Nunaannik naapitsinermi Norgep kitaani peroriartorsimanerminit sorlaqarfini naleqartitanilu ilisarisinnaanerarpai kulturilu pinngortitaminit aqunneqartoq takusinnaanerarlugu. Inuillu oqaasiinnaanngitsut atorlugit attaveqatigiittut.

- Kalaallisut oqaatsini timilu atorlugut ersersitseriaatsini imminut unammillertarpunga. Oqaasinngortinngikkaluarlugu qanoq annertutigisumik oqartoqarsinnaaneranik, NAPA-p pisortaa Anne Mette Gangsøy, ukiumi ataatsimi atorfimminiissimasoq, nassuiaavoq.

- Tassami Zoom aqqutigalugu tatiginninnermik ineriartortitsiniarneq ajornakusoorsinnaavoq.

NAPA-p pisortaata Anne Mette Gangsøyip norskisut oqaatsini qungujorujussuarnermik malitseqartippai AG-mit nunani avannarlerni kulturikkut ingerlatsiviup Katuami najugaqarfiani naapinneqarami.

Svenskimut Mats Bjerdemut Nunani Avannarlerni Piorsarsimassutsikkut Attaveqaammut pisortatut atorfimmi taartaasutut ilisaritinneqaqqammersimavoq, maajillu aallaqqaataani sulilersussaasimalluni coronap tuniluunnera atuutilermat.

Kalaallit Nunaat matusimaoq.

Internettikkut attaveqaat Zoom atorneqartariaqalersimavoq.

Taamaattorli Gangsøy iluatsitsillutik nunatsinnut immikkut akuerisaallutik angalasinnaasut akornanniissimavoq, taamaattumillu maajip 21-anili pisortap issiavianut ingissinnaalersimalluni.

- Maanga tikissinnaalersinnanga qaammatip ataasiinnannguup ingerlasimanera qujamasuutigisorujussuuara, oqarpoq.

Taamaalilluni NAPA-mi sulisunik amerlanngitsut ingerlaannangajak inuttut ilisarisimalersinnaasimagai Islandimi Savalimmiuni Nordens Husini, Helsinkimi Nordisk Kulturkontaktimi aamma Ålandimi Nordens Institutimi nunani avannarlerni piorsarsimassutsikkut psiortaqartini taamaallaat internettikkut attaveqaatit aqqutigalugit suli ilisarisimasarai.

Vestlandimi peroriartorsimasoq

NAPA-p pisortaa Norgep kujataata kippasissuani Stavangerimi 1967-imi inunngorsimavoq, animi ukiunik qulingiluanik angajulliusup Jan Trygvep najaatut.

Angutaa aalisartukkormiuuvoq taamaammallu aalisartutut umiartortutullu sulisimalluni, arnaalu nunaateqarfimmi peroriartorsimalluni. Arnaa aappariit meeraat marluk ilagalugit angerlarsimaannartuusimavoq.

Angajoqqaavi 1924-mi inunngortutut sorsunnersuup siulliup taalliisimanerani peroriartorsimapput Sorsunnersuullu Kingulliup nalaani inuusuttuusimallutik, tamannalu angerlarsimaffianni naleqartitanut sunniuteqarsimalluni.

- Angajoqqaakka sorsunnersuarmit sunnersimaneqarsimaqaat. Angerlarsimaffitsinni naammagittarneqarsimavoq;assersuutigalugu nerisassat isumagilluarneqartarsimapput, imaanngitoq piujuaannartitsisoqassammat, kisianni taamaaliornissaq eqqortuusimammat, Anne Mette oqaluttuarpoq, piffissamilu kingullermi kulturip ileqqutoqqallu tamatuma animinut imminullu qanut sunniuteqartigisimanerat eqqarsaatigisorujussuusimanerarlugu.

Aviisimi AG-mi atuarnerusinnaavutit. Aviisi uani pisiariuk:

Powered by Labrador CMS