NAPA avannaanukalersoq
Qeqertgarsuup tunuani meeqqat inersimasullu juunip qaammataani Nunani Avannarlerni Piorsarsimassutsikkut Attaveqaat - NAPA naapissinnaavaat, suliniaqatigiiffik Nunani Avannarlerni ilinniagaqarnissamut, højskoleriarnissamut aasaaneraniluunniit suliffeqarnissamut periarfissanik oqaluttuariartorluni angalassamaarpoq.
Nunatsinni meeqqat sunik takorluugaqarpat? NAPA juunip qaammataani Qeqertarsuup Tunuani angalanermini, atuarfinni inuusuttunullu ilinniarfinni meeqqanut inuusuttunullu apeqqummik tassannga apeqquteqartarniarpoq.
Angalanermi isumaliortaatsikkut innarluutillit aammalu kingusittumik
ineriartortut atuarfiat Ado Lyngep Atuarfia, Qasigiannguani efterskole Aasiannilu GUX kiisalu illoqarfinni tamani kulturilerisut aqqusaaneqassapput.
NAPA-mit aamma neriuutigineqarpoq, suliniutinut Kalaallit Nunaanni meeqqanik inuusuttunillu peqataatitsisunut kulturikkut tapiiffigineqarnissamut qinnuteqarsinnaanermut periarfissat angalanermi saqqummiunneqartassasut
- Innuttaasut kulturilerinermi pinngorartitsinermut ineriartuinermullu namminneq
peqataanissaminnut periarfissarpassuaqarput, taamaattumillu NAPA-p kulturimut tapiisarfianut angalanitsinni naapitassagut qinnuteqaqqullugit kaammattortassavagut, suliniaqatigiiffimmit tusagassiorfinnut nalunaarummi allassimavoq.
Ikiortissaqarneq
Innuttaasut kulturilerisullu kikkulluunniit NAPA-p siunnersuisarfianut “Tamassa”-mut saaffiginninnissaminnut tikilluaqqusaapput, tassani suliniummut atatillugu qanoq missingersuusiortoqarsinnaanersoq, NAPA-p kulturimut tapiisarfianut qanoq
qinnuteqartoqarsinnaanersoq aamma sumi suleqatissarsiortoqarsinnaanersoq imaluunniit puljenut aningaasaateqarfinnullu allanut sumi qinnuteqartoqarsinnaanersoq pillugit angalanermi saaffiginnissinnaapput, NAPA-mi ilisimatitsissutigineqarpoq.
Avannaani angalanermi ilaatigut pilersaarutaavoq, ilinniartitsisut atuarfinnilu pisortat Nunani Avannarlerni atuarfiit suleqatigiinnerat pillugu periarfissanik aamma programmi Nordplus pillugu paasissutissinneqartarnissaat.
Tamatumunnga peqatigitillugu suliniaqatigiiffimmit nunami meeqqat inuusuttullu nunanik avannarlernik suleqateqarnermi sunikoq periarfissaqartoqarnissoq pillugu ilisimatitsissuteqarusuppoq.
Angalaneq Ilulissani 3. juni aallartissaaq, tassanngaanniillu Qasigiannguit, Aasiaat, Qeqertarsuaq tikeriarlugit Kangaatsiami 18. juni taamaatissalluni.
- NAPA-p meeqqat, inuusuttut inersimasullu kulturilerisut Qeqertarsuup tunuaneersut naapinnissaat qilanaaraa, suliniaqatigiiffimmit oqaatigineaqarpoq.