Nanortalimmi attaviit tamarmik kipineqarput
Kujataani radiokkut attaveqaasersuutimi ikuallattoqarnerata kingorna Tusassimik atuisut tamarmik attavii tallimanngornermi kipisoorput. Radiokkut attaveqaasersuummut iluarsaassiartortussat teknikerit tikiunnissaminnik sulissuteqarput.
Nanortalimmi, taassumallu nunaqarfiini sisamani Aappilattoq, Narsaq Kujalleq, Tasiusaq aamma Ikerasassuaq attaviit tallimanngornermi kipisoorutigineqarput. TV-mut, radiomut, oqarasuaatinut, oqarasuaatit angallattakkanut, internetimut VH-imullu attaviit tamarmik eqqorneqarput.
Illoqarfinni pineqartuni attaviit kipisoortussanngornerannut aarlerisaarummik Tusass tallimanngornermi ullaakkut nal. 10.00 missaani nassiussaqarpoq.
Nanortalimmi nunaqarfiinilu attaviit sisamanngornermili kipiluttunarsisimapput. Radioqarfimmimi ikuallattoqarnermik kalerrisaarut aallartissimavoq.
- Radioqarfimmi ikuallattoqarneranik kalerrisaarut ippassaq aallartippoq. Naatsorsuutigaarput ikuallattoqarsimasoq, silalli ajornera pissutaalluni teknikerigut suli sitemukanngillat akornutinik aaqqiiartorlutik, Tusassimi attaveqatigiinnermik pisortaq, Julie Rademacher Sermitsiaq.AG-mut ilisimatitsivoq.
Arfininngornermi nalunaaruteqaqqissasut
SMS-ikkut nalunaarummi, innuttaasut pissarsiarisaanni atuarneqarsinnaavoq teknikerit akornusersimasumukarniarlutik suliniuteqartut.
Tusassimi attaveqatigiinnermik pisortaq, Julie Rademacherip oqaatigisinnaanngikkallarpaa radioqarfimmi attaviit qaqugu iluarsineqassanersut. Nanortalimmimi silapilunnera pissutigalugu iluarsiisussat aallarnaveerput.
- Teknikerigut ippassaeli piareersimalerput. Site tikissavaat periarfissaq siulleq atorlugu. Nanortalimmi eqqaanilu attaviit qaqugu iluarsissanersut oqaatigisinnaanngikkallarparput. Aaqqiiniarlutali ilungersorluta sulivugut, oqarpoq.
Tulliani nalunaaruteqartoqassaaq arfininngornermi nal. 9.00.
Kalaallit Nunaata Politiivi tallimanngornermi ullaap tungaani ilisimatitsipput pigaartut oqarasuaataat Nanortalimmiit satellitikkut attaveqaatitigut attavigineqarsinnaajumaartoq. Sianernissamik periarfissaqanngitsut pisariaqartitsilernermi politeeqarfimmut aamma ornigussinnaapput.