Nanortalik: Coronavirusimik tunillatsissimasoq ataaseq
Ilisimasassarsiortut umiarsuaanni inuk ataaseq tikinnerminiit ullut tallimassaanni misissortinnermut atatillugu COVID-19-imik tunillatsissimasoq paasineqarpoq. Inuk napparsimanermut ersiuteqanngitsoq peqqissaavimmi ippassaq misissugassamik tigusiffigineqarsimavoq.
Inuk ataaseq, maannakkorpiaq Nanortalimmi ilisimasassarsiortut umiarsuaanniittoq, COVID-19-imik tunillatsissimasoq paasineqarpoq.
Corona pillugu allattoqarfik tusagassiorfinnut taama ilisimatitsivoq.
Inuk nunatsinnut angalasimavoq, napparsimanermullu ersiuteqarani. Tikinnermit ullut tallimassaannni misissortinnerani tunillatsissimasoq paasineqarpoq.
Umiarsuarmi ilaasut marluupput inuttallu 15-iullutik.
- Taakku tamarmik Nanortalimmi nalunaaquttap akunnerini marlussunni nunamut ikaarsimasimapput aammalu pingasunngorlutik agguarlutik tikinnerminniit ullut tallimassaanni Nanortallip peqqissaaviani misissortissimallutik. Umiarsuaq manna imaaniippoq, umiarsuarmiittullu qinnuigineqarput angalanerminnik unitsitseqqullugit aammalu innuttaasunut attaveqarnaveersaaqqullugit, corona pillugu allattoqarfik ilisimatitsivoq.
Nakorsaaneqarfik politiit suleqatigalugit umiarsuarmut issimasunullu tunngasunik, kiisalu tunillatsissimasumut qanillisimasinnaasut pillugit paasiniaaleruttorput.
Majip 25-aniilli coronavirusimik tunillatsissimasumik nutaamik aatsaat nassaartoqaqqippoq.