Nanoq qulimiguulimmut saassussisoq
Air Greenlandimi timmisartortartoq aamma Tele-Postimi sulisut marluk nannumit saassunneqarput, kisianni isumannaatsumut pisinnaasimapput. Piffimmi najugaqartut mianersoqquneqarput.
Nanoq ullaap tungaani timmisartortartumut Air Greenlandimeersumut aamma Tele-Postimi sulisunut marlunnut Sandersons Hopep eqqaani Upernaviup eqqaaniittumi ulorianartorsiortitsivoq.
Politiit tusagassiuutinut nalunaarummi taama ilisimatitsipput.
- Nanoq timmisartuaqqamut saassussivoq, qujanartumillu atortunut taamaallaat innarliisimavoq. Inuit najuttuut illuaqqamut qimaasariaqarsimapput, tassanngaaniillu politiinut ikiortissarsiorsimapput, taakkulu timmisartuaqqamut allamut ilaallutik tikiunneqarsimapput, Kalaallit Nunaanni Politiit ilisimatitsipput.
Nanoq qimaavoq
Politiit takkummata nanoq qaqqakkut ammut qimaasimavoq, inuillu inuunerannut ulorianartorsiortitsiunnaarsimasutut nalilerneqarmat politiit toqutsinissamut akuersissummik piumasimanngillat.
- Upernavimmi eqqaanilu innuttaasut nannumut saassussisumut mianersoqquneqarput, politiit mianersoqqusipput.