Nanoq Ittoqqortoormiini pisarineqartoq

Marlunngormat unnukkut nanoq Ittoqqortoormiinut pisimavoq. Nanoq qimminut nerukkaatissanik nerileruttortoq aallaallugu toqunneqarsimavoq:

- Nannup tumaasigut takuneqarsinnaavoq kujataanit illoqarfimmukarsimasoq, Erling Madsen Ittoqqortoormiini piniarnermik nakkutilliisoq oqaluttuarpoq.

Arnamit nannumik angerlarsimaffimmi silataaniittumik takusaqarsimasumit nal. 21.45 nalunaarfigineqarsimavoq.

- Arnap aappaa aallaaserluni illumit anillassimavoq, nanoq illup aappariillu qimmiisa akornannut pisimammmat, Erling Madsen oqaluttuarpoq.

Qimmit qilunnerisigut illumi najugallit nanoqarnertoq paasisimavaat.

Nanoq silap taarnera pissutigalugu tammaaneqarsimasoq

Erling Madsen oqaluttuarpoq, nalunaarfigineqarnermi kingorna minutsit tallimat qaangiummata illumut apuussimalluni, arnalli aappaata oqaluttussimavaa, taarnera pissutigalugu nanoq takusinnaajunnaarsimallugu.

- Oqaluttuuppaanga nanoq assut qaasussimasoq, eqqaamiuisalu illuata tungaanut ingerlasimasoq, Erling Madsen oqarpoq.

Pisoq Ittoqqortoormiit kangiata tungaani pisimavoq. Tassani illut qaammaqquteqaratillu najugaqarfigineqanngitsut inissisimapput, taamaammat Erling Madsenip nanoq sumiissusersiuminaatsissimavaa.

- Illumut sanilianiittumut ingerlaqqippunga, sanilianilu najugaqartoq naapillugu, taassuma aamma qimmit tusaasimavai nanorlu takusimallugu, illulli akornanni tammaalersimallugu, Erling Madsen oqaluttuarpoq.

Tamatuma kingor Erling Madsen nannumik ujaasilluni aallartissimavoq.

Qimminut nerukkaatissaanik nerisoq pisarineqartoq

Piniarnermut nakkutilliisoq sumiiffimmut utermat, piniartut marluk nanoq qimminut nerukkaatissanik nerisoq nassaarisimavaat.

- Taakku oqaluttuuppaannga, nanoq sukkasuupilussuarmik utersimasoq, qimminullu nerukkaatissanut poorineqartoq matulik naamallugu tikissimagaa.

- Qimminut nerukkaatissat puuata matua peersimavaa nerillunilu aallartilluni. Angutip tassani najuuttup qimaatinniarsimagaluarpaa, soqutiginaguli qimminut nerukkaatissanik nerilluni aallartissimalluni.

Taamaamma nanoq suli qimminut nerukkaatissanik nerisoq aallaallugu toqunneqarsimavoq.

Erling Madsenip oqaluttuaraa, nanoq taamatut pissusilersortoq qimaatikkuminaattupilussuusoq. Aamma pasitsaassimavaa, nanoq taannaasoq sapaatip akunnerini kingullerni arlaleriarluni qimaatittarsimasaa.

Amia illoqarfiup atuarfiani ilinniartitsissutitut atorneqassasoq

- Nanuuvoq piara 2,15 miiterit missaannik angissusilik. Saluppoq, orsuali suli 3-5 centimiiterinik issussuseqarluni. Orsua 10 centimiiteriusariaqaraluarpoq, taamaammat immaqa piniarluarsinnaasimanngilaq, Erling Madsen oqarpoq.

Piniarnermut nakkutilliisoq oqarpoq, nanoq toqutaaffigisaani pilanneqarsimasoq, piniartullu marluk nannumik toqutseqataasut pilaqataasullu neqinnassimasut.

Neqip sinnera utoqqaat illuannut illoqarfimmilu utoqqarnut namminneq najugaqartunut agguaanneqarsimavoq.

Nanoq imminut annaanniarluni toqunneqaraangat amia Namminersorlutik Oqartussanut tunniunneqartarpoq. Erling Madsenillu oqaluttuaraa, naalakkersuisoqarfillu isumaqatigiissimallutik, amia illoqarfiup atuarfianut tunniunneqarallassasoq:

- Timelærereqarpugut piniartumut nuliaasumik. Taassuma ameq qanoq qapiarneqassanersoq, errortorneqassanersoq orsortaajarneqassanersorlu atuartunut angajullernut ilinniartitsissutigisinnaavaa. Atuartut taamaalillutik nannut amiisa tunineqarsinnaanngornissaannut suliarineqartarneri qanoq ilungersunartigisinnaanersut paasisaqarfigissavaat, Erling Madsen oqarpoq.

Tamatuma kingorna Namminersorlutik Oqartussat ameq suneqassanersoq aalajangiiffigissavaat.

Sikorsuit pissutaallutik nannut ikinnerusut tikiuttartut

- Kukii niaqutalu saarnga qerititsivinnut ikisimavakka, Nuummilu Pinngortitalerifiimmut misissugassanngorlugtit tunniunneqarumaartluik, Erling Madsen oqaluttuarpoq.

Erling Madsenip oqaluttuaraa, aasarli tallimariarluni arfinileriarluniluunniit nannunik Ittoqqortoormiiniit qimaatitsisarsimalluni. Ukiakkut ilaatigut marloriaataannik amerlassuseqarsinnaasunik qimaatitsisarnermut sanilliullugu taakku ikittunnguupput:

- Ukioq manna iluatsitsisimaqaagut, kangerlummi sikorsuaqarnera pissutigalugu. Taamaammat nannut sikup sinaaniittarput illoqarfimmullu annguttartut ikittunnguullutik, Erling Madsen oqarpoq.

Naalakkersuisut qanittukkut ilisimatitsissutigaat, 2016-imiilli imminut illersorniarluni 17-eriarluni toqutsisoqartarsimasoq.

Piffissami kingullermi nannut najugaqarfinnut qanillivallaartarnerannik ajornartorsiuteqartarneq politikkikkut eqqumaffigineqarpoq.

Politikkerit arlallit isumaqarput, nannut qaqugukkut toqunneqartarnissaannut malittarisassat nutarterneqartariaqartut.