Nanoq ilaqutariinnut qanillimmat toqunneqarsimavoq
Nunaqarfiup Niaqornat kujataani nanoq arfininngormat silaannarmut igittarluni qimaatinniarneqartarsimagaluarpoq. Nanorli qimaatinneqarsinnaasimanngimmat toqunneqartariaqarsimalluni, politiit oqaluttuarput.
Ilaqutariit nunaqarfiup Niaqornat kujataani arfininngormat silakkut nerisassiornerminni nanoq takusimavaat.
Politiit arfininngornermi nalunaaqutaq 18.21 nalunaarfigineqarsimapput, nanoq aallaallugu tounneqarsimasoq, pigaartut pisortaat Hans-Peter Berthelsen Sermitsiaq.AG-mut oqaluttuarpoq.
- Nanoq qanillinnginniassammat arlaleriarluni silaannarmut igittoqartarsimavoq. Nannulli silaannarmut igittarnerit soqutigisimanngilai, meeqqanullu qanillimmat aallaallugu toqunneqartariaqarsimalluni, pigaartut pisortaat oqarpoq.
Sermitsiaq.AG-mit tamanna Aalisarnermut Piniarnermullu Naalakkersuisoqarfimmit oqaaseqarfigitinniarneqarpoq, maannamulli suli iluatsinngitsumik.
Nannup toqunneqarneranut atatillugu malittarisassat malinneqarsimanersut Naalakkersuisoqarfik naliliitinneqassaaq.