Nanoq ambassadøritut toqqarneqartoq
Nunarsuarmi uumasunik nuannarisallit taasinermikkut, uumasut nungutaanissamut ulorianartorsiortinneqartut ilisimaarineqarnerulernissaat anguniarlugu uumasut tallimat amabassadørissatut toqqarsimavaat. Nanoq takkununnga tallimanut ilaavoq, taakkulu ilagaat nagguaatsut, tiigerit liivillu.
Afrikami tammajuitsussaminnik piniartartut akornanni oqariartaaseqartoqarpoq: Big 5, tassalu uumasut aallaammik pisarissallugit pilerigineqarnerpaat tallimat. Taakkununnga assersuutitut ilaapput nagguaatsoq, siissisoq liiverlu.
Pinngortitamik assiliisartup Graeme Greenip Tuluit Nunaanneersup Big 5 allatut ingerlatilersimavaa, tassa aallaat atornagu assiliivimmik takutitassanik assiliisalersimavoq, tassani uumasut inuuffigisaminnik annaasaqartarnermikkut, inuit aaqqiagiinngitssuteqartarnerisigut, inerteqqutaasumik niueruteqartarnerisigut silallu pissusaata allanngoriartorneratigut nungutaanissaminnut qanoq ulorianartortsiortiginersut ilisimaarineqarnerulernissaat siunertaralugu.
Taasititsinerit
2020-mi apriilip qaammataanili nittartakkakkut newbig5-ikkut taasisoqartalersimavoq, inuillu nunarsuarmi tamarmeersut 50.000-inik amerlanerusut uumasunik tallimanik, nungutaasussatut aarlerinaateqartunik ambassadørissatut taasisimallutik.
Suliniut pinngortitami assiliisartunit nunanit 120-neersunit tapersersorneqarpoq.
Suliniut uumasullu tallimat toqqarneqarsimasut pillugit suliniuteqartoq Graeme Green imatut oqarpoq:
- Nunarsuarmi uumasut kusanarnerpaat taakku ilagiinnarpaat. Taakkulu tallimaallutik nungutaariaannaapput. Taakku uumasut angisoorsuit tallimat siulluinnarput. Nunarsuarmi uumasorpassuarnut nungutaariaannaasunut tamanut ambassadøriupput. Igutsanniit tunnulinnut, uumasut tamarmik pinngortitap imminut ataqatigiinneranut, uumassusillit imminnut ataqatigiinnerannut nunarsuattalu siunissaanut pingaaruteqarluinnartuupput, Graeme Green tusagassiorfinnut nalunaaruteqarnermi oqarpoq.
Suliniut pillugu paasisaqarnerullutillu asserpassuit kusanartut takukkit, uani: newbig5.com