tumerpartaartartoq
Nanook-unni tumerparpaartartuusimasoq uterpoq
Tumerparpaartartoq Martin Zinck Nunatsinni nipilersoqatigiit nuannarineqarnersaannut uterpoq
– Nuannaarutigeqalugu Nanook-unnit Martin Zinck nipilersoqatigiinni tumerparpaartutut uternerani tikilluaqquvarput.
Christian Elsner ullumi marlunngornermi tusagassiorfinnut nalunaarummigut aallartippoq.
Elsner naapertorlugu Kim Heilmann, ukioq ataaseq sinnilaarlugu Nanook-unni nipilersoqataasimasoq, nalunaarsimavoq nammineq inuttut atukkani pissutigalugit nipilersoqatigiinni peqataajunnaartariaqarluni.
Angalaqataasimavoq
Heilmann nuummik Pissaaneqaqisut immiusseqataasimavoq, kiisalu nipilersoqatigiit tusarnaartitsillutik ilaatigut Japanimi Tokyomut, Norgep avannaanut Canadamullu angalasarneranni peqataasarsimalluni.
– Kim Heilmann nipilersoqatigiit nipilersornerannut peqataasimanerani qutsavigerusupparput, taamatullu ikinngutaaneranut ilakkuminartuuneranullu. Maanna Martin Zinck tumerparpaartoreqqilerlugu tusarnaartitsisarnissanut nutaanut qilanaarpugut, Nanook-ut allapput.
Martin Zinck 2011-mi Nanook-unnut ilaasortaajunaarallarpoq.
Septembarimi Sermitsiaq.AG-p nipilersorneq sammivaa. Allaaserisat tamaasa atuarsimanngikkukkit maani periarfissaqarputit